AQSh Sırııadaǵy áskerı qatysýyn qysqartyp, bir ǵana bazany qaldyrady — arnaıy ókil

ASTANA.KAZINFORM — Vashıngton burynǵy ádis nátıje bermegenin aıtyp, eski strategııasynan bas tartty. Endi Sırııaǵa qatysty kózqarasyn qaıta qaraýǵa nıetti, dep habarlaıdy Kazinform agenttiginiń menshikti tilshisi.

AQSh burynǵy formattaǵy operatsııalardan bas tartyp, aımaqta ondaǵan jyl boıy júrgizilip kele jatqan saıasattyń tıimsizdigin moıyndady. Sırııadaǵy áskerı qatysýyn bir bazaǵa deıin qysqartady.

Bul týraly prezıdent Donald Tramptyń Sırııa boıynsha jańa arnaıy ókili jáne bir mezgilde AQSh-tyń Túrkııadaǵy elshisi Tomas Barrak NTV túrik telearnasyna bergen suhbatynda málimdedi.

- Bizdiń Sırııadaǵy qazirgi saıasatymyz sońǵy júz jyldaǵy saıasatqa uqsamaıdy, óıtkeni olardyń eshqaısysy nátıje bermedi, — dedi Barrak.

Onyń aıtýynsha, AQSh áskeri qazirdiń ózinde Deır-ez-Zor provıntsııasyndaǵy nysandardy qosa alǵanda, 8 bazanyń 7-inen áskeri men tehnıkasyn shyǵara bastady. Qalǵan kúshter eldiń soltústik-shyǵysyndaǵy Hasaka provıntsııasynda shoǵyrlanady.

Qaýipsizdik salasyndaǵy eki derekkóz Reuters agenttigine áskerı tehnıkany shyǵarý qazirdiń ózinde júrip jatqanyn rastady, bireýi Deır-ez-Zordan barlyq ásker shyǵarylyp jatqanyn aıtty.

AQSh Memlekettik departamentiniń ókili keıinirek áskerler sany operatsııalyq jaǵdaıǵa baılanysty «qajetine qaraı» túzetiletinin aıtty.

Qazir Sırııada 2000-ǵa jýyq AQSh áskeri qaldy, olardyń kópshiligi Sırııa demokratııalyq kúshteriniń (SDF) kúrd kúshterimen jumys isteıdi.

Kúrdterdiń halyqtyq qorǵanys bólimsheleriniń (YPG) aınalasynda ornalasqan SDF DAISh lańkestik tobymen kúreste AQSh-tyń negizgi seriktesi.

Alaıda Ankara YPG-di túrik memleketimen 40 jylǵa sozylǵan qaqtyǵystan keıin mamyr aıynda taratylǵanyn jarııalaǵan tyıym salynǵan Kúrdistan jumysshy partııasymen baılanysy bar qurylym retinde qarastyrady.

2025 jyldyń basynan Bashar Asad bılikten shettetilip, ýaqytsha prezıdent Ahmed ash-Sharaa bılikke kelgennen keıin batys elderi Damaskpen baılanysyn birtindep qalpyna keltire bastady. Ótken aptada Tomas Barrak 2012 jyldan beri alǵash ret Sırııa astanasyndaǵy elshilik rezıdentsııasynyń ústine AQSh týyn taǵy da kóterdi.

Túrkııa prezıdenti Rejep Taıyp Erdoǵan ótken aptada Sırııa úkimetimen qol jetkizilgen kelisimge qaramastan SDF-ti ıntegratsııalyq úderisti keshiktirip otyr dep aıyptady.

Osy ózgeristerge baılanysty AQSh Sırııadaǵy burynǵy baǵytyn qabyldamaı, shekteýli, biraq Vashıngtonnyń pikirinshe, naqtyraq qatysý formatyna kóshkenin jarııalady.

Buǵan deıin AQSh 2 aı ishinde Sırııadan áskerin shyǵara bastaýy múmkin ekenin habarlaǵan edik.

Izraıl seısenbi kúni basyp alynǵan Golan tóbelerine zymyran ushyrǵannan keıin Sırııaǵa qarsy jaýap qaıtardy.