AQSh Sırııada Islam memleketi sodyrlarynyń nysandaryna aýqymdy soqqy jasady
ASTANA. KAZINFORM – AQSh pen onyń odaqtastary Sırııa aýmaǵynda terrorıstik Islam memleketi (DAISh, Qazaqstanda tyıym salynǵan - red.) tobynyń nysandaryna birqatar dál soqqy jasady. Bul týraly BBC habarlaıdy.
AQSh Qarýly kúshteriniń Ortalyq qolbasshylyǵy – CENTCOM málimetinshe, operatsııaǵa qatysty sheshimdi AQSh prezıdenti Donald Tramp qabyldaǵan. Áskerı soqqylar senbi kúni «Hawkeye strike» («Suńqar soqqysy») kodtyq ataýymen júrgizilgen.
CENTCOM habarlaýynsha, bul operatsııa 13 jeltoqsanda Sırııada amerıkalyq áskerı qyzmetkerlerge qarsy jasalǵan, adam ólimine ákelgen shabýylǵa jaýap retinde uıymdastyrylǵan. Soqqylardyń negizgi maqsaty – terrorıstik ınfraqurylymdy joıý jáne óńirdegi odaqtas kúshterdiń qaýipsizdigin qamtamasyz etý.
– Bizdiń ustanymymyz ózgermeıdi: eger sizder bizdiń áskerı qyzmetkerlerge zııan keltirseńizder, biz sizderdi qaı jerde bolsańyzdar da taýyp, joıamyz. Eshbir jer kek qaıtarýdan qorǵaı almaıdy, – dep málimdedi AQSh Ortalyq qolbasshylyǵy.
Áskerı operatsııa barysynda AQSh pen onyń seriktesteri 90-ǵa jýyq joǵary dáldiktegi oq-dárini qoldanyp, 35-ten astam nysanǵa soqqy bergen. Operatsııaǵa 20-dan astam áskerı ushaq tartylǵan. Qazirgi tańda soqqy jasalǵan naqty aımaqtar men yqtımal adam shyǵyny týraly aqparat jarııalanǵan joq.
Atalǵan operatsııa Sırııadaǵy turaqsyz jaǵdaıǵa qaramastan, halyqaralyq koalıtsııanyń terrorızmge qarsy kúres baǵytyndaǵy áreketterin jalǵastyryp otyrǵanyn kórsetedi.
Eske salaıyq, buǵan deıin 20 jeltoqsanǵa qaraǵan túni AQSh áskerı kúshteri Sırııadaǵy DAISh sodyrlary men olardyń ınfraqurylymyna, sondaı-aq qarý-jaraq qoımalaryna áýe soqqylaryn jasaǵan bolatyn.
