AQSh Sırııa prezıdentin terrorıster tiziminen shyǵardy
ASTANA.KAZINFORM - Vashıngton Sırııanyń ýaqytsha prezıdenti Ahmad ash-Sharaany eldiń ishki ister mınıstri Anas Hasan Hattabpen birge terrorıster tiziminen shyǵardy. Bul týraly AQSh Memlekettik departamenti 7 qarasha kúni jarııalady, dep habarlaıdy DW.
BUU Qaýipsizdik Keńesiniń AQSh jobasyn qabyldaǵan qarary «Sırııanyń jańa taraýǵa kóshkenin rastaıtyn kúshti saıası belgi boldy», - delingen málimdemede.
- Prezıdent ash-Sharaa bastaǵan jańa Sırııa úkimeti joǵalǵan amerıkalyqtardy izdeýge, terrorızm men esirtkige qarsy kúres jónindegi mindettemelerin oryndaýǵa, hımııalyq qarý qaldyqtaryn joıýǵa jáne aımaqtyq qaýipsizdik pen turaqtylyqty, sondaı-aq Sırııa basqaratyn jáne Sırııaǵa tıesili ınklıýzıvti saıası protsesti ilgeriletýge bar kúshin salýda, - dedi Memlekettik departament.
10 qarashada Sırııanyń ýaqytsha prezıdenti Vashıngtonǵa alǵashqy saparyn josparlap otyr. Prezıdent Donald Tramppen kezdesýde ol AQSh bastaǵan «Islam memleketine» (Qazaqstanda tyıym salynǵan uıym - red. eskertpesi) qarsy kúresetin koalıtsııaǵa qosylý týraly kelisimge qol qoıady.
BUU Qaýipsizdik Keńesi Sırııa prezıdenti men ishki ister mınıstrine qarsy sanktsııalardy alyp tastady.
6 qarashada BUU Qaýipsizdik Keńesi DAISh jáne Ál-Qaıda (Qazaqstanda tyıym salynǵan uıymdar – red.) uıymdaryna baılanysty halyqaralyq sanktsııalar tiziminde bolǵan Sırııa prezıdenti Ahmad ash-Sharaa men ishki ister mınıstri Anas Hattabqa qarsy sanktsııalardy alyp tastady. Qaýipsizdik Keńesiniń 15 múshesiniń on tórti, sonyń ishinde Reseı AQSh usynǵan shekteýlerdi alyp tastaý týraly qarardy qoldap daýys berdi. Qytaı qalys qaldy.
Amerıka Qurama Shtattary birneshe aı boıy BUU Qaýipsizdik Keńesiniń múshelerin Sırııaǵa qarsy sanktsııalardy jeńildetýge shaqyryp keledi. Mamyr aıynda Tramp Vashıngtonnyń Damaskke qatysty saıasatynda aıtarlyqtaı ózgeris engizip, Amerıka engizgen ekonomıkalyq shekteýlerdiń alynyp tastalǵanyn jarııalady.
BUU Qaýipsizdik Keńesi Sırııa prezıdenti men ishki ister mınıstrine qarsy sanktsııalardy alyp tastaǵannan keıingi kúni ekeýi de Londondaǵy sanktsııalar tiziminen alynyp tastaldy.
Aıta keteıik, ótken jeltoqsanda Sırııa prezıdenti Bashar ál-Asad taqtan taıdyrylyp, Damaskten ketti.
Al 2025 jyldyń qańtar aıynyń sońynda Ahmad ash-Sharaa resmı túrde ýaqytsha kezeńge Sırııa prezıdenti bolyp jarııalandy.
Biz buǵan deıin Sırııa prezıdenti 1967 jyldan beri alǵash ret BUU Bas Assambleıasyna qatysqanyn habarlaǵan edik.