AQSh Sırııa oppozıtsııasyna áskerı kómek berýi múmkin
ASTANA. 28 aqpan. QazAqparat - Eki jylǵa taıap qalǵan Sırııadaǵy qarýly qaqtyǵystyń qashan aıaqtalatynyn, qalaı aıaqtalatynyn eshkim bilmeıdi. Adam qany sýdaı aqqan elde azamattyq soǵys beleń alyp bara jatqandaı ma, qalaı? Ne istemek kerek? Qalaı toqtatý kerek? Álem qaýymdastyǵynyń eldegi janjaldy beıbit jolmen sheshý talpynysy sátsizdikke ushyrady.
Aq úı qojaıyny Barak Obamanyń ákimshiligi osyǵan baılanysty Sırııaǵa qatysty tásilin ózgertýi múmkin, dep habarlaıdy muslim.kz. Eger qajet dep tapsa, Bashar Asadtyń «jany siri» rejımimen kúresip jatqan sırııalyq oppozıtsııaǵa áskerı kómek berýi de yqtımal. Bul jaıynda kári qurlyqqa at terletken AQSh memlekettik hatshysy Djon Kerrıdiń nókerleri habarlady.
Olardyń aıtýynsha, «Sırııaǵa qatysty Amerıka saıasatyndaǵy aıtýly ózgeris bola qalsa, kóterilisshilerdi bronejılet jáne bronemashınamen jabdyqtap, áskerı ónerge baýlıdy. Oppozıtsııalyq kúshter koalıtsııasyna tikeleı gýmanıtarlyq kómek kórsetedi». Alaıda, resmı tulǵalar Sırııaǵa qatysty mundaı saıasattyń áli qarastyrylyp jatqanyn, AQSh memlekettik hatshysy Djon Kerrıdiń Eýropadaǵy jáne Taıaý Shyǵystaǵy odaqtastarymen bul máseleni talqyǵa salatynyn jetkizdi. Bul jaıynda The Washington Post habar taratty.
Djon Kerrı Eýropada RF SІM basshysy Sergeı Lavrovpen kezdesti. Aldymen Londonda, sodan soń, Berlınge at basyn tiregen Djon Kerrı sársenbiniń sátinde Parıjde bolmaq. Sodan keıin sırııalyq oppozıtsııa ókilderimen kezdesý úshin Rımge attanady. Odan ary Túrkııaǵa jáne Mysyr men Parsy shyǵanaǵy elderin aralaıdy. Eýropa tórinde sóılegen sózinde ol Vashıngtonnyń Sırııa bıligi men oppozıtsııasy arasyndaǵy beıbit kelissózge kúsh salǵanyn aıtyp, onyń reti kelmese, kóterilisshilerge kómektesý máselesin qarastyratynyn jetkizdi.
Osy ýaqytqa deıin AQSh Sırııadaǵy janjalǵa tikeleı aralasqan emes. Kóterilisshilerge saıası qoldaý bildirip, olardy baılanys quraldarymen qamtamasyz etkeni bolmasa, qarý-jaraq berip, kómektesken emes. Ótken jyly AQSh prezıdenti Barak Obama sırııalyq oppozıtsııaǵa qarý-jaraq jetkizý týraly kómekshileriniń usynysynan bas tartqan bolatyn.
