AQSh sırek metaldar boıynsha Qytaıǵa táýeldilikti azaıtqysy keledi
ASTANA. KAZINFORM — AQSh armııasy men REalloys Inc. kompanııasy ıÝta shtatynyń Týele qalasyndaǵy áskerı bazada sırek kezdesetin aýyr metaldardy óńdeý zaýytyn salý týraly aldyn ala kelisimge qol qoıdy, dep habarlaıdy Kazinform agenttiginiń Vashıngtondaǵy menshikti tilshisi FOX Business basylymyna silteme jasap.
Joba AQSh armııasynyń strategııalyq ınvestıtsııalyq bastamasynyń bir bóligi retinde júzege asyrylady jáne Qurama Shtattardyń ónerkásiptik bazasyn nyǵaıtýǵa baǵyttalǵan.
Nysan shamamen 80 gektar jerge oryn tebedi. Ol dál basqarylatyn oq-dárilerdi, elektr qozǵaltqyshtaryn, radarlardy, sonarlardy jáne basqa da qorǵanys júıelerin óndirýge qajet dısprozıı men terbııdi óńdeýge mamandandyrylady. Kompanııa sonymen qatar turaqty magnıtter shyǵarýdy da qolǵa alyp, óndiris aýqymyn keńeıtpek.
Joba AQSh-tyń sırek metaldarmen qamtamasyz etý boıynsha Qytaıǵa táýeldilikti azaıtýdy jáne qorǵanys jetkizý tizbeginiń turaqtylyǵyn qamtamasyz etýdi maqsat etken.
REalloys kompanııasynyń bas dırektory Lıpı Shternheımnyń aıtýynsha, otandyq óndiristi nyǵaıtý zamanaýı tehnologııalardy damytý jáne ulttyq qaýipsizdik úshin strategııalyq mańyzǵa ıe. AQSh armııasynyń ókili Djeff Vaksman sonymen qatar dısprozıı men terbııdi óńdeýdegi Qytaıdyń monopolııasy AQSh-tyń eleýli osal tusy bolyp otyrǵanyn tilge tıek etti.
Kompanııa Batystyń mańyzdy mıneraldardy táýelsiz jetkizý tizbegin qurý birneshe jylǵa sozylýy múmkin dep sanaıdy. REalloys kompanııasynyń bas dırektory bul salada 2029-2030 jyldarǵa qaraı aıtarlyqtaı alǵa jyljý bolady dep esepteıdi. Degenmen, jobany júzege asyrý úshin jaldaý sharttaryn naqtylaý, ekologııalyq baǵalaý júrgizý jáne qajetti ruqsattardy alý qajet bolady.
Kelisim AQSh-tyń qorǵanys ónerkásibi úshin sırek kezdesetin jer metaldary men magnıtterdi satyp alýǵa shekteýlerin kúsheıtý aıasynda jasaldy. 2027 jyldyń 1 qańtarynan bastap AQSh qorǵanys merdigerlerine bul ónimderdi Qytaıdan, Reseıden, Soltústik Koreıadan jáne Irannan satyp alýǵa tyıym salynady. ıÝta zaýytynyń qurylysy strategııalyq mańyzdy mıneraldardy óńdeýge arnalǵan táýelsiz AQSh ınfraqurylymyn qurýǵa baǵyttalǵan bir qadam bolǵaly tur.
Aıta keteıik, Qazaqstan sırek metaldardy óńdep, Eýropaǵa daıyn ónim eksporttaýǵa basa nazar aýdaryp otyr.
Kazinform tilshisi álemdegi sırek metaldarǵa degen suranystyń artýyna baılanysty, Qazaqstannyń osy saladaǵy áleýetine saraptama jasady.
