AQSh Іshki qaýipsizdik mınıstrligi bıýdjet daýyna baılanysty jumysyn ishinara toqtatty
ASTANA. KAZINFORM — AQSh Іshki qaýipsizdik mınıstrliginde qarjylandyrý merziminiń aıaqtalýy jáne AQSh Kongresi bıýdjet boıynsha kelisimge kele almaýyna baılanysty ishinara jumys toqtatyldy, dep habarlaıdy Anadoly.
Amerıkalyq BAQ-tyń habarlaýynsha, Kongrestegi demokrattar men respýblıkashylar arasynda birneshe aptaǵa sozylǵan kelissózder nátıjesiz aıaqtalǵan. Taraptar Immıgratsııa jáne keden qyzmeti (ICE) men Keden jáne shekara qyzmeti (CBP) sııaqty bólimderdiń qyzmetin reformalaý jáne baqylaý máseleleri boıynsha ortaq mámilege kele almaǵan.
Demokrattar Mınnesota shtatyndaǵy oqıǵalardan keıin qosymsha qarjylandyrýdy federaldyq ımmıgratsııalyq sharalarǵa jańa shekteýler engizilmeıinshe qoldamaıtynyn málimdedi.
Bıýdjetke qatysty ymyranyń bolmaýyna baılanysty mınıstrlikte ishinara «shatdaýn» bastaldy. Bul birqatar qyzmettiń, sonyń ishinde AQSh Jaǵalaý kúzeti jumysyna irkilis qaýpin týdyrdy.
Qarjylandyrý bolmaǵan jaǵdaıda «asa mańyzdy qyzmetkerler» sanatyna jatatyn keıbir mamandar jalaqysyz jumys isteýge májbúr bolady, al ózge qyzmetkerler ýaqytsha aqysyz demalysqa jiberiledi.
Mınnesota shtatyndaǵy oqıǵalar
7 qańtarda Mınneapolıs qalasynda ICE qyzmetkerleri mıgranttarǵa qarsy operatsııa kezinde 37 jastaǵy AQSh azamaty Rene Nıkol Makklın Gýdty atyp óltirgen.
Krıstı Noem áıeldiń «ICE qyzmetkerlerin kólikpen qaǵyp ketpek bolǵanyn» málimdedi.
24 qańtarda Mınneapolıstegi narazylyqtar kezinde taǵy bir adam ustalý sátinde oqqa ushty. Bılik málimetinshe, qaza tapqan — 37 jastaǵy amerıkalyq medıtsınalyq qyzmetker Aleks Djeffrı Prettı. Oqıǵa kezinde onyń janynda qarý bolǵany habarlandy.
Osyǵan deıin AQSh-tyń Qazaqstandaǵy elshisi ımmıgratsııalyq vıza berýdiń ýaqytsha toqtatylýyn túsindirdi.
