AQSh sheteldikterge Anthropic-tyń eń qýatty JI modelderine qoljetimdilikti shektedi
ASTANA. KAZINFORM — AQSh bıligi Anthropic kompanııasyn óziniń eń qýatty JI-modelderine shetel azamattarynyń qoljetimdiligin jabýǵa mindettedi. Osy talapqa sáıkes kompanııa AQSh ishindegi jáne syrtyndaǵy barlyq paıdalanýshylarǵa, sonyń ishinde Anthropic-ta jumys isteıtin sheteldik qyzmetkerlerge de qoljetimdilikti tolyq toqtatty, dep jazdy 24kg.
— Bul buıryqtyń nátıjesinde biz Fable 5 jáne Mythos 5 modelderine barlyq klıentter úshin qoljetimdilikti kenetten toqtatýǵa májbúrmiz, bul talaptardy oryndaý úshin jasaldy, — dep málimdedi kompanııa.
Bılik bul sheshimdi qaýipsizdik organdarynyń talaptarymen baılanystyrǵanymen, naqty qandaı qaýip týraly sóz bolyp otyrǵany aıtylmaǵan. Anthropic derekterine sáıkes, úkimet Fable 5 modelin buzýdyń bir ádisi týraly bilgen. Kompanııa osy tásildi zerttep, keıbir álsiz tustardy anyqtaǵanymen, mundaı osaldyqtar basqa da ashyq modelderde bar ekenin atap ótken.
Kompanııa ókilderi model iske qosylar aldynda birneshe apta boıy AQSh úkimetimen, Ulybrıtanııanyń AISI ınstıtýtymen, jeke qaýipsizdik uıymdarymen jáne ishki mamandarmen birlesip myńdaǵan saǵattyq tekserý júrgizilgenin aıtqan. Nátıjesinde Fable júıesiniń qorǵanysy burynǵy kez kelgen modelden áldeqaıda myqty ekeni kórsetilgen.
Sonymen qatar Anthropic: qazirgi ýaqytta jasandy ıntellekt júıelerin «djeılbreık» ádisterinen tolyq qorǵaý múmkin emes dep sanaıtynyn jetkizdi.
Kompanııa úkimet talabyn oryndaǵanymen, osaldyq tabylýyn kommertsııalyq ónimdi tolyq toqtatýǵa negiz dep sanamaıtynyn bildirdi.
Buǵan deıin AQSh Qorǵanys mınıstrligi (Pentagon) men Anthropic arasynda kelispeýshilik týyndaǵan. Vedomstvo Claude modeline tolyq shekteýsiz qoljetimdilik suraǵan, al kompanııa basshysy bul talapty qabyldamaǵan. Keıin AQSh prezıdenti Donald Tramp memlekettik organdarǵa Anthropic modelderin paıdalanýǵa tyıym salǵany habarlanǵan.
Anthropic — álemdegi jasandy ıntellekt salasyndaǵy jetekshi amerıkalyq kompanııalardyń biri.
Aıta keteıik, jaqynda Meta jasandy ıntellekt kómegimen balalardyń paraqshalaryn buǵattaı bastaıdy.
