AQSh senatorlary polıtsııanyń elektroshoker qolǵaptaryn qoldaný týraly josparyn synady
ASTANA. KAZINFORM — AQSh-tyń táýelsiz senatorlar toby Immıgratsııa jáne kedendik baqylaý (ICE) qyzmetin elektr toǵymen soqqy beretin qolǵaptar satyp alýǵa 10-20 mıllıon dollar jumsaý josparynan bas tartýǵa úndedi, dep habarlaıdy Anadoly.
The Hill basylymynyń habarlaýynsha, Ketrın Kortes-Masto bastaǵan demokratııalyq jáne táýelsiz senatorlar toby ICE dırektorynyń mindetin atqarýshy Devıd Dj. Ventýrellaǵa hat joldaǵan.
Hatta senatorlar ICE-niń adamǵa elektr togyn soqqyzatyn G.L.O.V.E. qolǵaptaryn (Generated Low Output Voltage Emitter) satyp alýǵa 10-20 mıllıon dollar jumsaý josparyna qatysty «alańdaýshylyqtaryn» bildirdi jáne vedomstvony olardy paıdalanýdan bas tartýǵa shaqyrdy.
— Keıingi bir jylda ICE qyzmetkerleri shamadan tys kúsh qoldanyp, azamattyq quqyqtardy óreskel buzdy. Bul oqıǵalar ICE qyzmetkerleriniń daıyndyqtan jetkiliksiz ótkenin jáne tıisti túrde jaýapkershilikke tartylmaıtynyn kórsetedi, - delingen hatta.
Buǵan deıin AQSh ımmıgratsııa jáne keden qyzmeti (ICE) ofıtserlerge qarsylyq kórsetken adamdarǵa toq soqtyratyn arnaıy qolǵaptar satyp alýdy qarastyryp jatqany habarlanǵan bolatyn.
Bul qurylǵylardyń josparlanǵan quny 10 mıllıon dollardan 20 mıllıon dollarǵa deıin.
AQSh Іshki qaýipsizdik departamentiniń (DHS) habarlamasyna sáıkes, ICE resmı túrde «deeskalatsııa qurylǵylary» dep atalatyn qurylǵylardy satyp alýdy josparlap otyr.
Bul amerıkalyq Compliant Technologies kompanııasynyń G.L.O.V.E. (Generated Low Output Voltage Emitter) ázirlemesine qatysty. Qyzyǵy, abbrevıatýranyń ózi aǵylshyn tilindegi «qolǵap» sózine uqsas estiledi.
Qalypty rejımde qurylǵy standartty qyzmettik qolǵap retinde qoldanylady, biraq qyzmetker elektr rejımin iske qosa alady.
Adam terisimen tikeleı janasqanda qolǵap aýyr elektr toǵy soǵý áserin týdyrady. Qurylǵy tutqyndaý kezinde fızıkalyq qarsylyq kórsetken adamdarǵa qoldanylady dep josparlanǵan.
