AQSh Senaty Týlsı Gabbard pen Robert Kennedıge daýys beredi

ASTANA. KAZINFORM – AQSh Senaty Týlsı Gabbardty Ulttyq barlaý dırektory, kishi Robert Kennedıdi densaýlyq saqtaý mınıstri etip bekitti, dep habarlaıdy NBC News.

Gabbardtyń kandıdatýrasyn 48 daýysqa qarsy 52 senator maquldady.

Senattyń Barlaý komıtetindegi tyńdaýda cóz sóılegen Gabbard OBB men UQA-nyń burynǵy qyzmetkeri Edvard Snoýdenge keshirim nemese raqymshylyq suramaıtynyn málimdedi, biraq respýblıkashyl senatorlar qysym kórsetkende ony «satqyn» dep ataýdan bas tartty. Sonymen qatar, Gabbard buǵan deıin Qurama Shtattardyń Sheteldik barlaý qyzmetin qadaǵalaý týraly zańynyń 702-bólimine qatysty jasaǵan qatań synynan bas tartyp, Kongress ótken jyly jańa qorǵaý sharalaryn qabyldaǵannan keıin ony «asa mańyzdy» qural dep atady.

Demokrattar Gabbardty qatty synǵa alyp, respýblıkashyldar ulttyq qaýipsizdikten góri Donald Trampty ashýlandyrmaýǵa kóbirek alańdaıtynyn bildirtti.

Ulttyq barlaý dırektory AQSh-tyń barlaý qaýymdastyǵyn quraıtyn 18 agenttikke, sonyń ishinde Ortalyq barlaý basqarmasy men Ulttyq qaýipsizdik agenttigine jetekshilik etedi.

43 jastaǵy Gabbard – Irak soǵysynyń ardageri, armııa rezervinde jıyrma jyldan astam qyzmet etti. Ol 2020 jyly Demokratııalyq partııa atynan prezıdenttikke úmitker boldy, sodan keıin Djo Baıdendi qoldady. Keıinirek Baıden ákimshiliginen kóńili qalǵan ol 2022 jyly Demokratııalyq partııadan shyǵyp, 2024 jylǵy saılaý naýqanynda Trampty qoldap, Respýblıkalyq partııaǵa qosyldy.

Kishi Robert Kennedıdiń kandıdatýrasy 47-ge qarsy 53 daýyspen Densaýlyq saqtaý jáne halyqqa qyzmet kórsetý mınıstri bolyp bekitildi. 

Keıbir respýblıkashyldar Kennedıdiń buryn vaktsınalarǵa qarsylyǵy jáne túsik jasatýdy qoldaǵanyn eskere otyryp, oǵan kúmánmen qaraıdy. Biraq onyń kandıdatýrasyn bekitý tyńdaýlary kezinde Kennedı endi «vaktsınalar qoǵamdyq densaýlyq saqtaýda mańyzdy ról atqarady» dep senetinin málimdedi. Jasandy túsik jasatýǵa qatysty ustanymy týraly suraqqa ol: «Men prezıdent Tramptyń árbir abort – tragedııa ekendigi týraly pikirimen kelisemin», dep, abort týraly zańdardy shtattardyń qaraýyna qaldyrý kerektigin qosyp ótti. 

Buǵan deıin AQSh Senaty Donald Tramptyń álemdik naryqta AQSh-tyń «energetıkalyq ústemdigine» qol jetkizý saıasatyn júzege asyratyn Energetıka mınıstri Krıs Raıt kandıdatýrasyn maquldady.