AQSh Senaty soǵys ókilettikteri týraly rezolıýtsııany qarastyrady
ASTANA. KAZINFORM – Senator, Nıý-Iorkten kelgen demokrat Chak Shýmer BAQ ókilderimen telefon arqyly sóılesý barysynda AQSh prezıdenti Donald Trampty Kongressti «tolyǵymen qarańǵyda» ustap otyr dep synǵa aldy, dep habarlaıdy Kazinform tilshisi.
– Prezıdenttiń minez-qulqyna qarasaq, ol munyń qanshalyqty qaýipti ekenin túsinbegen syńaıly. Túsinikti bolsyn. Madýro – zańsyz dıktator. Biraq kongress ruqsatynsyz, ári qaraı ne isteý kerektigi týraly senimdi josparsyz áskerı qımyldardy bastaý – oısyzdyq, - dedi Chak Shýmer.
Senator Tramp ákimshiligin jaýapkershilikke tartý úshin jasalǵan birneshe áreketterdi de atap ótti.
Birinshiden, senator ol jáne Ókilder palatasynyń demokratııalyq jetekshisi Hakım Djeffrıs Tramp ákimshiliginen kelesi aptada Kongresstiń barlyq múshesi úshin brıfıng ótkizýdi suraǵanyn aıtty.
– Ákimshiliktiń maqsattaryn, bizdi taǵy bir sheksiz soǵysqa aparatyn nemese bir jemqor dıktatordy ekinshisimen almastyratyn gýmanıtarlyq jáne geosaıası apattyń aldyn alý josparlaryn bilgimiz keledi, - dedi Chak Shýmer.
Amerıkalyq saıasatker Tramptyń Venesýela vıtse-prezıdenti ony tyńdaıtyny týraly málimdemesinde aıtty. Birneshe mınýttan keıin Venesýela bıligi Madýrony bosatýdy talap etetinin jáne Tramp ákimshiliginiń áreketin qoldamaıtynyn málimdedi.
– Kongresstiń soǵys jarııalaý quqyǵy bar jáne bul máselelerdi mundaı mańyzdy oqıǵa bolǵanǵa deıin qarastyrýǵa bolady. Biz olardan [Tramp ákimshiliginen] brıfıng ótkizýdi suradyq, biraq eshqandaı aqparat alǵan joqpyz, - dedi Chak Shýmer.
Ekinshiden, Senat kelesi aptada soǵys ókilettikteri týraly rezolıýtsııany qarastyrady.
Úshinshiden, kongress komıtetteri ákimshilikti jaýapkershilikke tartý úshin qalaı áreket ete alatynyn qarastyramyz. Senator: «Aldaǵy kúnderi olardan kóbirek estısizder» dedi.
Shýmer óz komandasynyń kóptegen múshesimen sóıleskenin, barlyǵy bul qanshalyqty qaýipti ekenine qatty alańdaıtynyn atap ótti.
Eske sala keteıik, buǵan deıin Venesýela prezıdenti jubaıymen birge ustalyp, elden evakýatsııalanǵanyn habarlaǵanbyz. Sondaı-aq Venesýeladaǵy oqıǵaǵa baılanysty álem elderiniń reaktsııasyn da jarııaladyq.
Óz kezeginde AQSh Venesýela prezıdentin «narkoterrorızm» úshin aıyptady. Sonymen birge Venesýelaǵa qarsy áskerı operatsııaǵa 150 bombalaýshy, joıǵysh jáne barlaý ushaǵy qatysqanyn jazdyq.