AQSh Senaty Pem Bondıdi Bas prokýror qyzmetine bekitti

ASTANA. KAZINFORM – AQSh Senaty Pem Bondıdi Ádilet mınıstrliginiń basshysy laýazymyna bekitti.

Onyń kandıdatýrasyn joǵarǵy palata 46-ǵa qarsy 54 daýyspen maquldady, tek bir demokrat, Pensılvanııa senatory Djon Fetterman daýys berýde barlyq respýblıkashyldarǵa qosyldy, dep habarlaıdy CBS News.

Osy aıdyń basynda Senattyń Ádilet komıtetinde kandıdatýrasyn maquldaý boıynsha ótken tyńdaýda Bondı mınıstrlikti «saıasattandyrmaıtynyn» jáne «ádildik búkil el boıynsha beıtarap oryndalatynyn» málimdedi. Senattyń zań komıteti onyń kandıdatýrasyn Senat qaraǵanǵa deıin 10-ǵa qarsy 12 daýyspen qoldady.

- Bekitilgen jaǵdaıda men Ádilet mınıstrligine jáne onyń árbir quramdas bólikterine senim men adaldyqty qalpyna keltirýge tyrysamyn. Amerıkada barlyq adam úshin ádilettiliktiń bir deńgeıi bolady, - dep málimdedi Pem Bondı.

Bas prokýror retinde Bondı kóptegen quqyq qorǵaý vedomstvolaryn, sonyń ishinde FTB men alkogol, temeki, atys qarýy jáne jarylǵysh zattar bıýrosyn qamtıtyn keń departamentti qadaǵalaıdy. Eki agenttik te Donald Tramp tarapynan shabýylǵa jıi ushyraǵan.

Bondı sonymen qatar burynǵy arnaıy prokýror Djek Smıt basqarǵan Trampqa qatysty federaldy isterdi tergeýge quqyly. Trampqa qarsy qozǵalǵan eki qylmystyq is Ádilet mınıstrliginiń qazirgi prezıdentti qýdalaýdy boldyrmaıtyn saıasatyna baılanysty toqtatyldy.

Pem Bondı Tramp ákimshiliginiń bekitilgen 10-shy joǵary laýazymdy qyzmetkeri boldy.

Eske sala ketsek, qarasha aıynda jańadan saılanǵan AQSh prezıdenti Donald Tramp bas prokýror laýazymyna Pem Bondıdi kandıdat retinde atady.

Buǵan deıin AQSh Senaty Krıs Raıtty AQSh-tyń energetıka mınıstri retinde maquldaǵanyn jazǵan bolatynbyz.