AQSh Senaty Ortalyq Azııa elderimen qarym-qatynastyń mańyzyn moıyndady
ASTANA. KAZINFORM — AQSh-tyń 119-shy Kongresiniń ekinshi sessııasy barysynda Senat Ortalyq Azııa elderi táýelsizdiginiń 35 jyldyǵyna arnalǵan jáne Qurama Shtattardyń Qazaqstan, Qyrǵyzstan, Tájikstan, Túrikmenstan jáne Ózbekstanmen qarym-qatynasynyń mańyzyn moıyndaıtyn №816 qararyn qabyldady, dep habarlaıdy Kazinform agenttiginiń Vashıngtondaǵy tilshisi AQSh Kongresine silteme jasap.
Qarardy senatorlar Stıv Deıns (respýblıkashyl), Gerı Pıters (demokrat), Djon Kertıs (respýblıkashyl), Devıd Makkormık (respýblıkashyl), Krıstofer Merfı (demokrat) jáne Djekı Rozen (demokrat) qoldady.
AQSh Senatynyń 816-shy qarary:
1. Ortalyq Azııa elderin táýelsizdikteriniń 35 jyldyǵymen quttyqtaýǵa.
2. Amerıka Qurama Shtattarynyń Qazaqstan, Qyrǵyzstan, Tájikstan, Túrikmenstan jáne Ózbekstanmen qarym-qatynasynyń strategııalyq mańyzyn rastaýǵa.
3. Barlyq memlekettiń syrtqy májbúrleýsiz ózderiniń syrtqy saıasatyn, qaýipsizdik sharalaryn jáne ekonomıkalyq odaqtaryn anyqtaýǵa degen qol suǵýǵa bolmaıtyn quqyǵyn tolyq qoldaýǵa.
4. Ortalyq Azııa elderiniń táýelsizdigi, egemendigi jáne aýmaqtyq tutastyǵy Eýrazııadaǵy beıbitshiliktiń, qaýipsizdiktiń jáne kúshter tepe-teńdiginiń negizi bolyp tabylatynyn rastaýǵa qaýly etedi.
Qararda Amerıka Qurama Shtattarynyń Ortalyq Azııanyń bes elimen qarym-qatynasy ekijaqty jáne C5+1 sııaqty forýmdarda turaqty damyp kele jatqany atap kórsetilgen.
Atalǵan elder terrorızm, zańsyz aınalym jáne aımaqtyq turaqsyzdyq sııaqty transulttyq qaýip-qaterlerge qarsy turýda mańyzdy seriktester bolyp sanalady.
Sonymen qatar Ortalyq Azııa men Kavkaz Shyǵys pen Batysty baılanystyratyn mańyzdy geosaıası kópir qyzmetin atqarady, mańyzdy jahandyq saýdany, energetıkalyq qaýipsizdikti jáne Orta dáliz sııaqty dálizder arqyly tsıfrlyq baılanysty jeńildetedi.
Senat Ortalyq Azııa elderinde júrgizilip jatqan memlekettik basqarý reformalary, sybaılas jemqorlyqqa qarsy bastamalar jáne ekonomıkalyq jańǵyrtý olardyń uzaq merzimdi turaqtylyǵy men ınstıtýtsıonaldyq táýelsizdigin nyǵaıtatynyn eskeredi.
Qujatta AQSh Ortalyq Azııa naryǵyna kirýdi, jeke ınvestıtsııalardy jáne jetkizý tizbeginiń qaýipsizdigin jaqsartý úshin óńir elderindegi turaqty, táýelsiz ekonomıkalyq ekojúıelerdi damytýǵa umtylatyny aıtylady.
Sonymen qatar Qurama Shtattar men Ortalyq Azııa halqy arasyndaǵy bilim berý, mádenı jáne kásibı baılanystardy tereńdetý ózara túsinistik pen ortaq órkendeýge oń yqpal etedi.
Eske sala keteıik, AQSh sarapshylary Qazaqstandaǵy konstıtýtsııalyq reforma azamattardyń memlekettik basqarýǵa qatysýyn keńeıtetinin aıtqan bolatyn.
