AQSh Senaty mıllıarder Aızekmandy NASA basshysy qyzmetine bekitti

ASTANA. KAZINFORM — AQSh Senaty kásipker ári mıllıarder Djared Aızekmannyń NASA basshysy qyzmetine kandıdatýrasyn maquldady. Bul týraly BBC habarlady.

Ony 67 senator qoldasa, 30 senator qarsy daýys bergen.

Aızekman agenttikti basqarǵan alǵashqy saıası tájirıbesi joq basshy atanbaq. Ol áýesqoı ushqysh retinde tanymal ári ashyq ǵaryshqa shyqqan alǵashqy kásibı emes astronavt bolyp esepteledi.

Forbes deregine sáıkes, onyń baılyǵy shamamen 1,2 mlrd dollardy quraıdy. Bul qarajat tólemdermen aınalysatyn kompanııadan, sondaı-aq ushqyshtardy daıarlaý jáne jeke áýe parkin basqarý salasyndaǵy bıznesten túsken.

Aızekmandy SpaceX kompanııasymen kásibı alys-beris baılanystyrady. Alaıda ol Aıdy ıgerý baǵdarlamalaryn damytý men onyń resýrstaryn zertteý baǵytyn qoldaıdy. Bul ustanym Marsty basym baǵyt retinde qarastyratyn Ilon Masktyń kózqarasymen sáıkes kelmeıdi.

Buǵan deıin NASA basshysynyń mindetin kólik mınıstri Shon Daffı ýaqytsha atqaryp keldi.

Mamyr aıynda Donald Tramp Aızekmannyń kandıdatýrasyn onyń baılanystaryn qosymsha tekserý qajettigin alǵa tartyp, keri qaıtaryp alǵan edi. Alaıda keıinirek Tramp mıllıarder Djared Aızekmandy NASA basshysy qyzmetine qaıtadan kandıdat retinde usyndy.