AQSh Senaty men Ókilder palatasynda demokrattar basym tústi
ASTANA. KAZINFORM — AQSh-ta aralyq saılaý aıaqtaldy. NBC News boljamynsha, Demokratııalyq partııa Ókilder palatasy men Senattaǵy basymdyqqa ıe bolady.
NBC News telearnasynyń málimetinshe, Demokratııalyq partııa dástúrli túrde Respýblıkalyq partııany qoldaıtyn birqatar shtatta jeńiske jetken.
Senatta demokrattar Aıova, Kanzas, Ogaıo, Men, Soltústik jáne Ońtústik Karolına, sondaı-aq Tehas shtattarynda jeńiske jetip, qosymsha jeti oryn ıelendi. Bul shtattardyń keıbiri kóp jyl boıy respýblıkashyldardyń tiregi sanalyp kelgen. Sondyqtan saılaý qorytyndysy eldegi saıası tepe-teńdikti aıtarlyqtaı ózgertti.
Telearnanyń boljamyna sáıkes, Ókilder palatasyndaǵy demokrattardyń sany keminde 258 orynǵa jetedi. Al palatada basymdyqqa ıe bolý úshin 218 mandat jetkilikti. Daýys sanaý qorytyndysyna qaraı bul kórsetkish azdap ózgerýi múmkin.
Degenmen birqatar okrýgte saılaý qorytyndysy áli shyqqan joq. Máselen, saılaý ýchaskeleri jaqynda jabylǵan Gavaıı men Alıaskada daýystardy sanaý jalǵasyp jatyr.
Budan bólek demokrattardyń jetistigi gýbernator saılaýynda da baıqaldy. Partııa ókilderi Tehas, Djordjııa, Nevada, Ogaıo jáne Aıova shtattarynda jeńiske jetip, bes shtattaǵy pozıtsııasyn nyǵaıtty.
Kongrestiń jańa quramy 2027 jyldyń qańtarynda jumysqa kirisedi. Osylaısha telearnanyń boljamyna sáıkes, demokrattar AQSh zań shyǵarýshy organynyń qos palatasyna da baqylaý ornatýǵa múmkindik alady.
NBC News málimetinshe, saılaý nátıjesi AQSh-taǵy saıası kúshterdiń ornalasýyna eleýli ózgeris ákelgenimen, prezıdenttiń aýysýyn nemese jańa úkimettiń jasaqtalýyn bildirmeıdi. Degenmen Kongrestegi oryn sanyn arttyrǵan demokrattar zań shyǵarý úderisine yqpal etip, respýblıkashyldardyń bastamalaryna tosqaýyl qoıa alady.
Fox News telearnasyna bergen suhbatynda AQSh prezıdenti Donald Tramp demokrattardyń saılaýdaǵy jetistigin moıyndaǵanymen, mundaı nátıjeni kútpegenin aıtty. Sondaı-aq ol saılaý qorytyndysyn jeke jeńilisi dep sanamaıtynyn, óıtkeni saılaýshylarǵa kandıdattar unamaǵanyn jetkizdi.
Buǵan qosa, Tramp respýblıkashyldardyń demokrattarmen keıbir máseleler boıynsha birlesip jumys isteýge daıyn ekenin aıtsa da, olardyń birqatar bastamasyna qarsy shyǵatynyn ańǵartty. Ol Truth Social áleýmettik jelisinde «Veto» (Veto) degen jazýy bar qyzyl kepkanyń sýretin jarııalady. Bul demokrattar usynǵan zań jobalaryna veto qoıýy múmkin ekenin bildiredi.
Buǵan deıin AQSh Kongresinde bılik aýysýy múmkin ekenin, demokrattardyń Ókilder palatasyn baqylaýǵa alýdy kózdep otyrǵanyn habarlaǵanbyz.
