AQSh Senaty Iranmen soǵysty toqtatý týraly qarardy qabyldamady
ASTANA. KAZINFORM – AQSh prezıdenti Donald Tramptyń Iranda soǵys júrgizý múmkindigin shekteýge baǵyttalǵan qarar Senatta tórtinshi ret cátsizdikke ushyrady, dep habarlaıdy Reuters.
Sársenbi kúni AQSh senatorlarynyń kópshiligi Donald Tramptyń Iranǵa qarsy áskerı naýqanyn qoldap, Kongress áskerı áreketterdi sanktsııalaǵanǵa deıin qaqtyǵysty toqtatýǵa baǵyttalǵan qararǵa qarsy daýys berdi.
Demokratııalyq partııa ókilderi usynǵan qarardy 47 depýtat qoldady, al 52-si qarsy daýys berdi.
Qarardy jaqtaýshylar amerıkalyq kóshbasshynyń 28 aqpanda Izraıl jaǵyna ótip soǵys bastaý arqyly konstıtýtsııalyq ókilettiginen tys áreket etkenin alǵa tartty.
Alaıda Aq úı jáne Kongrestegi barlyq derlik respýblıkashyldar Tramptyń áreketteri zańdy jáne onyń shekteýli áskerı operatsııalarǵa buıryq berý arqyly AQSh-ty qorǵaý jónindegi bas qolbasshy retinde ókilettigine sáıkes keletinin málimdedi.
Bul demokrattardyń soǵys bastalǵannan beri Senatta soǵys ókilettikteri týraly zań jobalary boıynsha daýys berýdi qamtamasyz etýge baǵyttalǵan tórtinshi áreketi boldy. Barlyq derlik respýblıkashyl senatordyń qarsylyǵyna baılanysty bul áreketter sátsiz boldy. Merzim sáýir aıynyń sońynda aıaqtalady.
AQSh Konstıtýtsııasy soǵysqa barý týraly sheshim qabyldaý quqyǵyn Kongreske qaldyrady, al prezıdentter operatsııalardy birjaqty tártippen tek ózin-ózi qorǵaý jaǵdaıynda ǵana bastaı alady.
Soǵys ókilettikteri týraly 1973 jylǵy zańǵa sáıkes, Kongress soǵys bastalǵannan keıin 60 kún ishinde soǵys jarııalaýy nemese kúsh qoldanýǵa ruqsat berýi kerek — bul merzim osy aıdyń sońynda aıaqtalady. Zańda bul merzimdi 30 kúnge uzartý qarastyrylǵan, biraq zań shyǵarýshylar ákimshiliktiń qaqtyǵysty tez arada toqtatý josparyn usynýyn qalaıtynyn anyq bildirdi.
Osy arada demokrattar qaqtyǵys aıaqtalǵanǵa deıin nemese Kongress áskerı áreketterdi jalǵastyrýǵa ruqsat bergenshe soǵys ókilettikteri týraly qararlardy engizýdi jalǵastyrý nıetin málimdedi.
Ókilder palatasy (AQSh Kongresiniń tómengi palatasy) osyǵan uqsas zań jobasyn osy aptanyń sońynda qarastyrady dep kútilip otyr.
Eske sala ketsek, AQSh prezıdenti Donald Tramp Vashıngton men Tegeran arasyndaǵy qaqtyǵys aıaqtalýǵa jaqyn dep sanaıdy. Ol bul másele boıynsha óz pikirin Fox News telearnasyna bergen suhbatynda aıtty.
Sondaı-aq Pákistan delegatsııasy AQSh-pen kelissózderdi jalǵastyrý úshin Iranǵa kelgenin jazǵan bolatynbyz.
AQSh pen Iran arasyndaǵy kelissózder osy aptada qaıta jandanýy múmkin.
