AQSh Senaty Iranmen soǵysty toqtatý týraly qarardy qabyldady
ASTANA. KAZINFORM — AQSh Kongresiniń Senaty Vashıngton ákimshiligin Iranǵa qarsy áskerı is-qımyldardy toqtatýǵa shaqyratyn qarar qabyldady, dep habarlaıdy TASS.
Qujatty qoldap 50 senator daýys berse, 48-i qarsy shyqty. AQSh-tyń bıleýshi respýblıkalyq partııa qatarynan tórt zań shyǵarýshy qarardy qoldady. Al demokrattar arasynan tek bir senator ǵana qarsy daýys bergen. Osyǵan uqsas qujat maýsym aıynyń basynda AQSh Ókilder palatasy tarapynan da maquldanǵan bolatyn.
Bul jaǵdaıda sóz Kongrestiń ár palatasynda jeke qabyldanatyn qarar týraly bolyp otyr. Onyń zańdyq kúshi joq jáne tek usynymdyq sıpatqa ıe. Mundaı qujattar arqyly zań shyǵarýshylar óz ustanymdaryn bildiredi. Al AQSh-tyń atqarýshy bıligi olardy elemeýge quqyly.
Qararda AQSh prezıdenti Donald Tramp «amerıkalyq qarýly kúshterdi Iran Islam Respýblıkasyna qarsy áskerı is-qımyldardan shyǵarýy tıis» dep kórsetilgen. Bul talap Iranǵa qarsy áskerı áreketter Kongrestiń maquldaýyn almaǵan jaǵdaıda jáne amerıkalyq kúshterdiń qatysýy AQSh-ty nemese onyń odaqtastaryn shabýyldan qorǵaý úshin qajet bolmaǵan kezde oryndalýy kerek.
AQSh Konstıtýtsııasy boıynsha soǵys jarııalaý quqyǵy prezıdentke emes, Kongreske berilgen. Soǵan qaramastan, sońǵy onjyldyqtarda amerıkalyq prezıdentter shetelde áskerı kúsh qoldanýǵa qatysty Kongress bergen ruqsattardy keńinen túsindirip, is júzinde jańa áskerı operatsııalardy bastaý úshin paıdalanyp keldi.
Buǵan deıin Vashıngton men Tegeran barlyq maıdandarda, sonyń ishinde Lıvanda, áskerı qımyldardy dereý toqtatýdy kózdeıtin ózara túsinistik týraly memorandýmǵa qol qoıǵan bolatyn. 21 maýsymda Shveıtsarııadaǵy Bıýrgenshtok eldi mekeninde AQSh pen Iran ókilderi arasynda Doha men Islamabadtyń deldaldyǵymen memorandýmdy iske asyrý máselesine arnalǵan kelissózder ótti.
Kelissózderdiń alǵashqy kezeńi aıaqtalǵannan keıin jarııalanǵan birlesken málimdemede Pákistan men Katar taraptary Iran men AQSh ókilderiniń kezdesýi oń ári syndarly jaǵdaıda ótkenin atap ótti. Taraptar belgili bir ilgerileýshilikke qol jetkizip, aldaǵy tehnıkalyq kelissózderdi ótkizýge negiz qalaǵan.
Aıta keteıik, AQSh Iranǵa qarsy munaı sanktsııalaryn ýaqytsha toqtatty.
