AQSh Senaty Iranmen soǵysqa qatysty Trampty taǵy da qoldady
ASTANA. KAZINFORM — AQSh Senaty Iranmen soǵysqa baılanysty prezıdent Donald Tramp ókilettikterin shekteýge baǵyttalǵan áskerı ókilettikter rezolıýtsııasyn qaıtadan keri qaıtardy, dep habarlaıdy Kazinform agenttiginiń Vashıngtondaǵy menshikti tilshisi.
Senatorlardyń daýysy — 53 qarsy, 47 qoldaý — demokrattardyń Trampty Irandaǵy áskerı áreketterdi shekteýge arnalǵan úshinshi áreketin sátsiz etti, dep habarlaıdy CBS News.
Djon Fetterman Pensılvanııadan shyqqan senator demokrattar arasynda rezolıýtsııaǵa qarsy daýys bergen jalǵyz adam boldy. Al Kentýkkıdan shyqqan respýblıkashyl senator Rend Pol qujatty qoldaǵan.
Nıý-Djersıden shyqqan demokrat senator Korı Býker usynǵan rezolıýtsııada prezıdentke «AQSh qarýly kúshterin Iran aýmaǵyndaǵy nemese Iranǵa qarsy qaqtyǵys aımaǵynan shyǵarý, tek soǵys jarııalaý nemese áskerı kúsh qoldanýǵa arnaıy ruqsat bolǵan jaǵdaıda ǵana áreket etý» mindettelgen. Alaıda AQSh Kongresi Iranǵa qarsy áskerı kúsh qoldanýǵa ruqsat bermegeni atap ótilgen.
Konnektıkýt shtatynyń demokrat senatory Krıs Merfı Tramp ákimshiligin Iran máselesi boıynsha jarııa tyńdaýlardan jaltarǵany úshin aıyptady. Ol senat aldynda AQSh qoǵamyna soǵystyń sebepterin túsindirýdi boldyrmaýǵa tyrysqanyn aıtty.
— Men olardyń osy soǵysty aqtaı alatynyna senbeımin. Meniń oıymsha, eger olar shynymen amerıkalyq qoǵam aldynda sóz sóılep, benzın baǵasynyń nege sonsha joǵary ekenin, rejımdi aýystyrýmen aınalysyp jatqandaryn nemese joq ekenin, sondaı-aq jerge basyp kirmeı ıadrolyq qarý men ıadrolyq materıaldardy qalaı alýdy josparlap otyrǵandaryn túsindirýge májbúr bolsa, senattaǵy daýystaryn joǵaltady, — dedi Krıs Merfı.
Buǵan deıin Senat 4 naýryzda, sondaı-aq ótken jylǵy maýsymda AQSh-tyń Irannyń ıadrolyq nysandaryna áýeden shabýyl jasaǵannan keıin áskerı ókilettikterge qatysty rezolıýtsııalardy keri qaıtaryp tastaǵan.
Sondaı-aq, Aq úı búginge deıin Iranǵa qarsy áskerı operatsııalarǵa jumsalǵan shyǵyn 12 mıllıard dollarǵa jetkenin habarlady.
