Djýlı Stafft AQSh-tyń Qazaqstandaǵy elshisi bolyp taǵaıyndaldy
ASTANA.KAZINFORM - AQSh Senaty Djýlı Stafftty AQSh-tyń Qazaqstandaǵy kelesi elshisi etip bekitti, dep habarlaıdy Kazinform agenttiginiń menshikti tilshisi.
Stafft buǵan deıin Moldova men Djıbýtıdegi, sondaı-aq AQSh-tyń Reseıdegi, Efıopııadaǵy jáne Polshadaǵy mıssııalarynda ókildik basshysynyń orynbasary qyzmetin atqarǵan.
Ol Case Western Reserve ýnıversıtetin jáne Dıýk ýnıversıtetin bitirgen jáne orys, rýmyn, frantsýz jáne polıak tilderin biledi. 2023 jyly ol federaldy qyzmetkerler úshin eń joǵary azamattyq marapat sanalatyn Prezıdenttiń erekshe qyzmeti syılyǵyn aldy.
Ol sondaı-aq jeti mártebeli qyzmet marapatyna jáne Amerıkanyń syrtqy qyzmet qaýymdastyǵynyń syılyǵyna ıe.
- Eger men bul qyzmetke taǵaıyndalsam, meniń basty mindetim Qazaqstandaǵy barlyq amerıkalyqtyń, sonyń ishinde elshilik pen konsýldyq qyzmetkerleriniń qaýipsizdigin qamtamasyz etý bolady, - dedi Djýlı Stafft.
Ol Qazaqstanmen ekonomıkalyq baılanysty, ásirese energetıka jáne mańyzdy paıdaly qazbalar salasyn tereńdetýdiń strategııalyq mańyzyn atap ótti.
- Búgin biz ýran óndirisi boıynsha álemdik kóshbasshy, iri munaı eksporttaýshysy jáne mańyzdy paıdaly qazbalardyń mol qorynyń ıesi Qazaqstanmen saýda jáne energetıkalyq yntymaqtastyqtyń jańa dáýiriniń tabaldyryǵynda turmyz, - dedi Djýlı Stafft.
Ol AQSh-tyń gúldenýi úshin ekonomıkalyq, energetıkalyq jáne iskerlik máseleler bıýrosymen, AQSh-tyń halyqaralyq damý qarjy korporatsııasymen, Amerıka Qurama Shtattarynyń Eksport-ımport bankimen jáne jeke sektormen jumys isteıtinin atap ótti.
Senatorlar, Nıý-Gempshırlik Djınn Shahın men Montana shtatynan respýblıkashyl Stıv Deıns Staffttyń dıplomatııalyq qyzmettegi tájirıbesin joǵary baǵalap, onyń Qazaqstanǵa AQSh elshisi bolyp taǵaıyndalýyn quptady.
Buǵan deıin AQSh-tyń Qazaqstandaǵy elshisi laýazymyna úmitker Djýlı Stafft Amerıka Qurama Shtattarynyń ekonomıkasy men ulttyq qaýipsizdigi úshin mańyzdy dep tanylǵan mańyzdy paıdaly qazbalardyń jartysyna jýyǵy Qazaqstan aýmaǵynda bar ekenin málimdegenin jazǵan edik.