AQSh saıasatkeri Charlı Kırktiń ólimine qatysty jańa derekter jarııalandy
ASTANA. KAZINFORM — AQSh-tyń ıÝta shtatynda konservatıvti belsendi ári Donald Tramptyń jaqtasy Charlı Kırkti óltirýge qatysty tergeý jalǵasyp jatyr. Bul týraly BBC habarlady.
Turning Point USA qozǵalysynyń 31 jastaǵy negizin qalaýshy Charlı Kırk Utah Valley ýnıversıtetinde sóz sóılep turǵan sátte oq tıip, kóz jumǵan bolatyn.
FTB-nyń arnaıy agenti Robert Bols málim etkendeı, kúdikti qoldanǵan qarý — syrǵymaly bekitpesi bar vıntovka ormandy aýmaqtan tabylǵan. Ol jaqqa qylmysker oq atqan shatyrdan sekirip qashqan. Qarý qazir saraptamaǵa jiberildi.
CBS dereginshe, ol Mauser markaly, 30-06 kalıbrli vıntovka bolyp shyqqan.
Sarapshylar kúdiktige tıesili aıaq kıim izi men alaqan jáne bilezik izderin de tapqan.
ıÝta shtaty Qoǵamdyq qaýipsizdik departamentiniń komıssary Bo Meıson kúdiktiniń qozǵalys baǵytyn anyqtaǵanyn aıtty. Ol kampýsqa 11:52-de kelgen. Keıin baspaldaq arqyly shatyrǵa kóterilip, sol jerden oq atqan. Boljam boıynsha, qylmysker stýdent jasyndaǵy adam, sondyqtan ýnıversıtet ortasynda kózge túspegen.
FTB Solt-Leık-Sıtı keńsesi tergeýge baılanysty izdeý salynǵan adamnyń sýretin jarııalap, kópshilikten kómek surady. Bul sýret – tergeý organdary resmı jarııalaǵan alǵashqy beınejazbadaǵy tulǵa.
AQSh-tyń prezıdenti Donald Tramp Charlı Kırkti qaıtys bolǵannan keıin Prezıdenttiń Bostandyq medalimen marapattaıtynyn málimdedi.
«Biz ony qatty saǵynamyz. Biraq Charlıdiń kóptegen jastardyń júregine sińirgen úni men batyldyǵy ómir súre beredi, buǵan kúmánim joq», — dedi Tramp.