AQSh Saýda palatasy: Qazaqstanǵa turaqty qalypty saýda qatynastary mártebesin berý bastamasyn qoldaıdy
ASTANA. KAZINFORM — AQSh Saýda palatasynyń aǵa vıtse-prezıdenti Hýsh Choksı Qazaqstan men AQSh arasyndaǵy iskerlik yntymaqtastyqty odan ári damytýǵa daıyn ekenin málimdedi.
Ol bul týraly Astanada ótken Qazaqstan — AQSh bıznes dóńgelek ústelinde aıtty.
— AQSh kompanııalary Qazaqstandaǵy eń iri ınvestorlar bazasyn quraıdy. Olar ártaraptandyrylǵan ekonomıkanyń ósip kele jatqan bóligine aınalyp otyr, — dedi Hýsh Choksı.
Onyń aıtýynsha, amerıkalyq kompanııalar Qazaqstanda tsıfrlyq tehnologııalar, qarjy, dástúrli jáne jańa energetıka, qurylys, ınfraqurylym, azyq-túlik, aýyl sharýashylyǵy jáne densaýlyq saqtaý salalarynda jumys istep jatyr.
Hýsh Choksı ekijaqty saýda kólemi 5 mlrd dollarǵa jetkenin, al AQSh-tyń Qazaqstanǵa salǵan jıyntyq ınvestıtsııasy 100 mlrd dollardan asqanyn atap ótti. Sondaı-aq Qazaqstanda 600-den astam amerıkalyq kompanııa jumys isteıdi.
— Biz AQSh Kongresinde Djekson-Venık túzetýiniń kúshin joıý jáne Qazaqstanǵa turaqty qalypty saýda qatynastary mártebesin berý jónindegi eki partııalyq bastamany qoldaýdy jalǵastyramyz, — dedi AQSh Saýda palatasynyń ókili.
Ol sondaı-aq AQSh bıznesi Orta dálizdiń mańyzy artyp kele jatqanyn oń baǵalaıtynyn jáne bul baǵyttaǵy jumystyń jalǵasýyna múddeli ekenin jetkizdi.
Hýsh Choksıdiń aıtýynsha, AQSh Saýda palatasy Qazaqstan Úkimetimen, jeke sektormen jáne amerıkalyq kompanııalarmen áriptestikti odan ári nyǵaıtýǵa nıetti.
