AQSh Saýd Arabııasynan dıplomattaryn evakýatsııalap jatyr
ASTANA. KAZINFORM — AQSh Memlekettik departamenti qaýipsizdikke baılanysty Saýd Arabııasyndaǵy dıplomattarynyń bir bóligin jáne elshilik qyzmetkerleriniń otbasy múshelerin elden shyǵaryp jatyr, dep habarlaıdy Report.
Bul týraly AQSh Memlekettik departamentiniń resmı saıtynda jarııalanǵan.
— Iemen hýsıtteri Saýd Arabııasyna qarsy áskerı áreketter júrgizip, azamattyq áýejaılar men asa mańyzdy ınfraqurylym nysandaryna soqqy berip jatyr. Sonyń saldarynan beıbit turǵyndar qaza taýyp, kólik qatynasy edáýir buzylǵan. Qaqtyǵys aımaǵynan tys jerlerde de jaǵdaıdyń tez ýshyǵý qaýpi bar, — delingen vedomstvo habarlamasynda.
Memlekettik departament dıplomattardyń koroldiktegi kez kelgen áýejaıdy paıdalanýyna mıssııa basshysynyń arnaıy ruqsaty qajet ekenin eskertti. Buǵan Saýd Arabııasyndaǵy áýejaılarǵa zymyrandar men ushqyshsyz ushý apparattary arqyly jasalǵan sońǵy shabýyldar sebep bolǵan.
— AQSh azamattary áýejaılarǵa shabýyl jasalýy, áýe keńistiginiń jabylýy, reısterdiń toqtatylýy jáne kólik qatynasynyń buzylýy múmkin ekenin eskergeni jón, — dep habarlady syrtqy saıası vedomstvo.
Sonymen qatar AQSh bıligi óz azamattaryna Saýd Arabııasynda zymyranǵa qarsy qorǵanys júıeleri men ushqyshsyz ushý apparattaryna, sondaı-aq olardyń qulaǵan jerlerine qatysty aqparatty fotoǵa túsirýge, jarııalaýǵa jáne taratýǵa tyıym salynatynyn eske saldy.
— Bul talaptardy buzǵany úshin, sonyń ishinde memlekettik ǵımarattardy, áýejaılardy jáne zymyrandar men drondardyń qulaǵan jerlerin sýretke túsirgeni úshin AQSh azamattary ustaldy, — dep málimdedi Memlekettik departament.
Aıta keteıik, AQSh qorǵanys mınıstri Pıt Hegset Iran soǵysy týraly qupııa aqparattyń taralýyna qatysty generaldy qyzmetinen shettetti.
