AQSh Saýd Arabııasyna 24,3 mlrd dollarǵa 48 joıǵysh ushaq satpaq
ASTANA. KAZINFORM – AQSh ákimshiligi Saýd Arabııasyna F-35 Lightning II Joint Strike Fighter joıǵysh ushaqtaryn jáne olarǵa qajetti jabdyqtardy 24,3 mlrd dollarǵa satý týraly kelisimge keldi, dep habarlaıdy TASS agenttigi.
Áńgime 48 joıǵysh ushaq týraly bolyp otyr. AQSh ár ushaqqa Pratt & Whitney F135-PW-100 qozǵaltqyshyn beredi. Sonymen qatar taǵy bir qosalqy qozǵaltqysh jetkiziledi. Budan bólek, qorǵalǵan baılanys, navıgatsııa jáne shıfrlaý júıeleri usynylady.
AQSh bıliginiń málimetinshe, bul kelisim NATO quramyna kirmeıtin negizgi odaqtastardyń biriniń qaýipsizdigin nyǵaıtý arqyly AQSh-tyń syrtqy saıasaty men ulttyq qaýipsizdik salasyndaǵy maqsattaryna qol jetkizýge yqpal etedi.
AQSh Memlekettik departamenti men Pentagon ókilderi atap ótkendeı, usynylyp otyrǵan kelisim Saýd Arabııasynyń qorǵanys qabiletin kúsheıtip, AQSh Qarýly kúshterimen, sondaı-aq óńirdegi jáne NATO elderiniń áskerı kúshterimen jedel úılesimdiligin arttyrý arqyly qazirgi jáne bolashaq qaýip-qaterlerdi tejeý múmkindigin keńeıtedi.
AQSh ákimshiliginiń málimdeýinshe, joıǵysh ushaqtardy satý óńirdegi áskerı tepe-teńdikti ózgertpeıdi jáne AQSh Qarýly kúshteriniń jaýyngerlik ázirligine keri áser etpeıdi.
Buǵan deıin The New York Times gazeti AQSh barlaý qyzmetiniń Saýd Arabııasyna besinshi býyndaǵy F-35 joıǵysh ushaqtaryn satqan jaǵdaıda Qytaı amerıkalyq tehnologııalarǵa qol jetkizýi múmkin degen alańdaýshylyǵyn jazǵan.
Basylymnyń málimetinshe, amerıkalyq barlaý sarapshylary Qytaı Saýd Arabııasyndaǵy «tyńshylyq» arqyly nemese Er-Rııadpen áskerı áriptestik aıasynda F-35 tehnologııalaryna qol jetkizýi múmkin dep esepteıdi.
Aıta keteıik, Pentagon Iranmen qaqtyǵys saldarynan oq-dári tapshylyǵy baryn moıyndaǵanyn jazdyq.
