AQSh sarapshysy Qazaqstannyń damýy úshin saıası turaqtylyq basty shart dep atady
ASTANA.KAZINFORM — Saıası turaqtylyq pen azamattardyń memlekettik ınstıtýttarǵa degen senimin tıimdi memlekettik saıasat júrgizýdiń mańyzdy sharttary retinde qarastyrý qajet. Bul týraly Hudson Institute ınstıtýtynyń aǵa ǵylymı qyzmetkeri Ken Morııasý málimdedi.
Onyń aıtýynsha, saıası úderisterdi baǵalaý kezinde belgili bir demokratııalyq ólshemderge sáıkestikti ǵana emes, memlekettiń turaqtylyq pen dáıekti damýdy qamtamasyz etý qabiletin de eskerý mańyzdy.
— Meniń oıymsha, basty másele eldiń demokratııaǵa qaraı bet alyp bara jatqanynda nemese barmaı jatqanynda emes. Negizgi nazardy saıası turaqtylyqty qalyptastyrýǵa aýdarý qajet, — dedi sarapshy.
Ken Morııasý turaqtylyq uzaq merzimdi memlekettik saıasatty ázirleý jáne júzege asyrý úshin qajetti jaǵdaı qalyptastyratynyn atap ótti.
Onyń pikirinshe, bul úderiste memlekettik ınstıtýttar men qoǵamnyń olarǵa degen senim deńgeıi mańyzdy ról atqarady. Adamdar úderiske senýi kerek. Sondyqtan ınstıtýttardyń mańyzy óte zor dep atap ótti.
Sarapshy sondaı-aq saıası ózgeristerdi baǵalaý ýaqytty qajet etedi. Sebebi qabyldanǵan sheshimderdiń saldary birden baıqala bermeıdi dedi.
Aıta keteıik, buǵan deıin sarapshy Qazaqstan Shyǵys pen Batys arasyndaǵy mańyzdy baılanystyrýshy elge aınalyp kele jatqanyn aıtqan edi.
