AQSh sarapshylary Qazaqstandy Táýelsizdik kúnimen quttyqtady
ASTANA.KAZINFORM — Qazaqstan ósip, jetilip, damyp, gúldenip keledi, dedi amerıkalyq sarapshylar elimizdi Táýelsizdik kúnimen quttyqtap.
Halyqaralyq salyq jáne ınvestıtsııa ortalyǵynyń prezıdenti Den Ýıtt Qazaqstandy táýelsizdiktiń 34 jyldyǵymen quttyqtady.
— Táýelsizdiktiń 34 jyldyǵymen quttyqtaımyn. Men Qazaqstanmen 33 jyl boıy jumys istep kelemin, sondyqtan Qazaqstannyń ósip, jetilip, damyp, gúldenip kele jatqanyn kórý men úshin úlken qýanysh jáne qurmet, — dedi Ýıtt.
Sarapshy muny prezıdenttiń bızneske ashyqtyǵy men Qazaqstan halqyna paıda ákelýge degen umtylysymen baılanystyrdy.
Ýıttiń aıtýynsha, Qasym-Jomart Toqaev pen Donald Tramptyń 5 qarashadaǵy kezdesýi Qazaqstan-Amerıka qarym-qatynasynyń qaıta jandanýyn bildiredi.
— Men Amerıkanyń qaıtadan oıanǵanyn jáne Ortalyq Azııanyń bizdiń syrtqy jáne ekonomıkalyq saıasatymyzdyń mańyzdy elementi ekenin, al Qazaqstan Ortalyq Azııanyń dál júreginde ornalasqanyn basa aıtqym keledi, — dedi Den Ýıtt.
Onyń pikirinshe, barlyq joldar Qazaqstan arqyly ótedi.
— Sondyqtan bizdi birge jarqyn bolashaq kútip tur dep oılaımyn jáne meniń úkimetim men prezıdentimniń Ortalyq Azııanyń mańyzdylyǵyn moıyndaýǵa oralǵanyna óte qýanyshtymyn. Al Qazaqstan ortalyǵynda ornalasqan. Taǵy da Qazaqstan halqyn táýelsizdiktiń 34 jyldyǵymen quttyqtaımyn, — dep atap ótti Den Ýıtt.
Ulttyq múdde ortalyǵynyń aǵa ǵylymı qyzmetkeri Endrıý Kýchıns Qazaqstandy Táýelsizdik kúnimen quttyqtady.
— Meniń oıymsha, biz AQSh-tyń Ortalyq Azııamen qarym-qatynasy úshin óte qyzyqty kezeńdi bastan keshirip jatyr. 5 qarashada ótken C5+1 kezdesýi úlken tabysqa jetti. Meniń oıymsha, eki jaqty saýda, Qazaqstan men Amerıka Qurama Shtattary arasynda qol qoıylǵan saýda-ekonomıkalyq kelisimder shynymen de qyzyqty, — dep atap ótti Endrıý Kýchıns.
Sarapshy yntymaqtastyqtyń «shyn máninde alǵa jyljýǵa laıyq» ekenin atap aıtty.
— Eger biz kommertsııalyq qarym-qatynastardy ornatýǵa jáne jeke sektormen baılanystardy damytýǵa kóbirek ýaqyt bólsek, múmkin saıasatqa az aralasar edik. Men Qazaqstandy táýelsizdiktiń 34 jyldyǵyn atap ótýimen quttyqtaımyn; bul keremet jetistik, — dep qorytyndylady Endrıý Kýchıns.
Biz buǵan deıin 30 jyldyq yntymaqtastyq AQSh pen Qazaqstan qatynasyna oń áser etkeni týraly Elshi pikirin jarııalaǵan edik.