AQSh sanktsııalardyń Qazaqstanǵa áserin barynsha jumsartýǵa tyrysady - QR SІM

NUR-SULTAN. QazAqparat – AQSh Reseıge salynǵan sanktsııalardyń Qazaqstanǵa áserin barynsha jumsartýǵa tyrysady. Bul týraly AQSh Memlekettik hatshysy Ýzra Zeıamen kezdesýden keıingi brıfıngide QR Syrtqy ister mınıstriniń birinshi orynbasary Aqan Rahmetýllın aıtty, dep habarlaıdy QazAqparat tilshisi.

«Másele shynymen de óte kúrdeli, baıypty. Qazir ǵana AQSh Memlekettik hatshysynyń orynbasary atap ótkendeı, AQSh Reseıge, birqatar tulǵaǵa teńdessiz sanktsııa salyp otyr. Elderimizdiń arasynda tereń ıntegratsııanyń, álemdegi eń uzyn shekaranyń bolýyna baılanysty bul sanktsııalardyń áserinen tysqary qalmaıtyndyǵymyz sózsiz. Muny qazirdiń ózinde baǵa qalyptasý saıasatynan, dúkenderdegi ahýaldan baıqap júrsizder», - dedi mınıstrdiń birinshi orynbasary BAQ ókilderiniń saýalyna oraı.

Ol Qazaqstan Úkimeti AQSh ókilderimen barlyq deńgeıde qarqyndy kelissóz júrgizip jatqanyn atap ótti.

«Osy oraıda AQSh-qa osynaý ıkemdiligi, yntymaqtastyqqa daıyndyǵy úshin rızashylyǵymdy bildirgim keledi. Syrtqy ister mınıstrligi qazirdiń ózinde múddeli taraptar kelissóziniń birneshe raýndyn ótkizdi. Oǵan Qazaqstan tarapynan ekonomıka men qarjy salasyna jumyldyrylǵan memlekettik organdar, «Atameken» UKP ókilderi, AQSh tarapynan Elshilik, Memlekettik departamenti, ózge de vedmostvolarynyń ókilderi qatysty. Atalǵan konsýltatsııalar barysynda bizdiń tarapymyzǵa osy sanktsııalar kezinde ne isteýmizge qatysty egjeı-tegjeıli jaýap berildi. Shyndyǵynda amerıkalyq tarap naryqtarymyzdyń, ekonomıkamyzdyń ózara tyǵyz baılanysty ekenin túsinip otyr jáne olar sanktsııalardyń qazaqstandyq ekonomıkaǵa áserin barynsha jeńildetýge, tómendetýge tyrysýda. Bul baǵytta jumys odan ary da jalǵasa beredi», - dedi Aqan Rahmetýllın.