AQSh Reseıdiń saýda seriktesterine 500 paıyzdyq baj salyǵyn engizýi múmkin

ASTANA. KAZINFORM — AQSh senatorlary Reseıge qarsy «surapyl» sanktsııalar ázirlep jatyr, bul sanktsııalar Pýtın kelissóz júrgizbese engiziledi, dep habarlaıdy Bloomberg. 

Bul týraly Donald Tramptyń jaqyn serigi respýblıkashyl senator Lındsı Grem aıtty. Ol 72 senatordyń qoldaýyna ıe ekenin málimdedi.

Zań jobasy tek Reseıge qarsy sanktsııalardy qoldanýdy qarastyrmaıdy. Reseıden munaı, munaı ónimderin, tabıǵı gaz nemese ýran satyp alatyn elderden ákelinetin ónimderge de 500 paıyzdyq baj salyǵy engizilýi múmkin. Sonymen qatar AQSh azamattaryna Reseıdiń memlekettik oblıgatsııalaryn satyp alýǵa tyıym salynady.

Gremniń aıtýynsha, Reseı prezıdenti «Tramptan asyp túsýge tyryssa, úlken qatelik jasaǵan bolar edi. Bul zań jobasy prezıdenttiń arsenalyndaǵy qural bolyp tabylady. Eger Tramp kelissózderdiń tyǵyryqqa tirelgenine senimdi bolsa, onda áreket bastalady». 

Onyń pikirinshe, Pýtın tańdaý aldynda tur: ne Tramppen kelissóz ústeline otyrý, ne «Reseı ekonomıkasynyń joıylýymen» betpe-bet kelý.

Tramp buǵan deıin Pýtındi urysty toqtatý úshin qadamdar jasamaǵany úshin birneshe ret synap, oǵan «banktik jáne qosymsha sanktsııalar» arqyly qysymdy kúsheıtýge daıyn ekenin bildirgen.

Eske sala keteıik, AQSh Ýkraına kelissózinen shyǵýy múmkin.