AQSh Reseı munaıyna qatysty sanktsııalardy jumsartýdy qarastyryp jatyr

ASTANA. KAZINFORM — AQSh prezıdenti Donald Tramptyń ákimshiligi álemdik energııa baǵasynyń ósýin tejeý úshin Reseı munaıyna qarsy sanktsııalardy odan ári jumsartý múmkindigin qarastyryp jatyr. Bul týraly Reuters agenttigi úsh habardar derekkózge silteme jasap habarlady.

Agenttiktiń jazýynsha, mundaı qadam AQSh-tyń Máskeýdi munaı satýdan túsetin tabystan aıyrýǵa baǵyttalǵan kúsh-jigerin kúrdelendirýi múmkin. Sebebi dál osy tabys Reseıge Ýkraınadaǵy soǵysty qarjylandyrýǵa kómektesip otyr.

AQSh bıligi mundaı sheshimdi álemdik munaı naryǵyndaǵy jaǵdaıdyń kúrt shıelenisýimen baılanystyryp otyr. Sońǵy ýaqytta Taıaý Shyǵystaǵy qaqtyǵystar saldarynan munaı jetkizý tizbekteri buzylyp, álemdik baǵalar aıtarlyqtaı ósti. Keıbir baǵalaýlar boıynsha, Brent markaly munaı baǵasy qaıtadan barreline 100 dollardan asyp ketken.

Aq úı birneshe nusqany qarastyryp jatyr. Sonyń ishinde Reseı munaıyna qatysty keıbir sanktsııalardy ýaqytsha jumsartý, sondaı-aq munaı naryǵyndaǵy tapshylyqty azaıtý úshin AQSh-tyń strategııalyq munaı qorynan shıkizat shyǵarý múmkindigi de bar.

Buǵan deıin AQSh bıligi sanktsııalardy ishinara jeńildetý aıasynda teńizde turyp qalǵan reseılik munaıdy satyp alýǵa ýaqytsha ruqsat bergen. Mysaly, Úndistanǵa baǵyttalǵan munaı partııalaryn satýǵa 30 kúndik jeńildik berilgen.

Alaıda sarapshylardyń aıtýynsha, sanktsııalardy álsiretý Vashıngtonnyń Reseıdiń munaıdan túsetin tabysyn azaıtý arqyly Ýkraınadaǵy soǵysty qarjylandyrý múmkindigin shekteý strategııasyna qaıshy kelýi múmkin.

Eske sala keteıik, keshe Vladımır Pýtın Donald Tramppen telefon arqyly sóılesti.

Al Frantsııa Taıaý Shyǵystaǵy odaqtastaryn qoldaý maqsatynda shamamen onǵa jýyq áskerı-teńiz kemesin, sonyń ishinde ushaq tasyǵysh kemeler tobyn Jerorta teńizine, Qyzyl teńizge jáne qajet bolǵan jaǵdaıda Ormýz buǵazyna jiberýi múmkin. Bul týraly Frantsııa prezıdenti Emmanýel Makron málimdedi.