AQSh Reseı men Qazaqstan jáne Belarýs arasyndaǵy Kedendik odaqtyń qurylýynan esh qaýip kórmeıdi - Rıchard Hoýgland
; ALMATY. Naýryzdyń 30-y. QazAqparat /Erbol Azanbek/ - Elbasy Nursultan Nazarbaev sáýirdiń 12-13 kúnderi Vashıngtonda ótetin ıadrolyq qaýipsizdik jónindegi búkilálemdik sammıtke qatysyp, AQSh prezıdenti Barak Obamamen kezdesedi. Bul týraly búgin Almatyda BAQ ókilderimen kezdesken AQSh-tyń Qazaqstandaǵy elshisi Rıchard Hoýgland málim etti,
deıdi QazAqparat.
Kezdesý barysynda AQSh Elshisi Kedendik odaq, Qazaqstannyń EQYU-na tóraǵalyǵy, Qazaqstandaǵy demokratııa máseleleri boıynsha suraqtarǵa jaýap berdi. «AQSh Reseı men Qazaqstan jáne Belarýs arasyndaǵy Kedendik odaqtyń qurylýynan esh qaýip kórmeıdi. Buny KSRO-ny qaıta qurýǵa talpynys dep te sanamaıdy. Keden odaǵynyń úlgisi álemde keń taraǵan. Kez-kelgen memleket ekonomıkalyq áriptesti ózi tańdaıdy. Keden odaǵy áli qurylý ústinde. Bunda áli de sheshimin tabýy tıis birqatar mańyzdy máseleler bar. Qazaqstannyń Kedendik odaqqa kirýi Qazaqstannyń Dúnıejúzilik saýda uıymyna kirýine esh kedergi keltirmeıdi dep oılamyn. Jalpy alǵanda, Kedendik odaq túrinde DSU-ǵa kirý qaralmaǵan. Sondyqtan Astana, Máskeý men Mınsk DSU-ǵa kirý týraly kelissózderdi jeke memleket retinde jalǵastyrýda», dedi AQSh Elshisi Keden odaǵynyń qurylýy týraly. Ol sondaı-aq óz sózinde Qazaqstannyń daǵdaryspen kúres úlgisin óte tıimdi dep atap ótti. «Qazaqstan daǵdarys ýaqytynda ekonomıkany ońtaılandyrýdyń óte durys úlgisin kórsetti. Daǵdarystan soń ekonomıkany damytýdy agrarlyq sala men óndiriske basty nazar aýdarýy da quptarlyq is», dedi R.Hoýgland. Al Qazaqstandaǵy demokratııa turǵysynda AQSh elshisi Rımniń birden salynbaǵanyn mysalǵa aldy. «Qazaqstan jas memleket, sondyqtan batys memleketterinde bar demokratııany talap etý orynsyz. Álemniń birde-bir elinde tolyqqandy demokratııa ornyqty dep aıtýǵa bolmaıdy. Demokratııa ár elde ártúrli baǵytta kórinis tabýda», dedi AQSh Elshisi.
