AQSh Raýl Kastro men Kýbanyń bes azamatyna aıyp taqty
ASTANA. KAZINFORM – AQSh bıligi Kýbanyń burynǵy prezıdenti Raýl Kastroǵa jáne taǵy bes kýbalyq azamatqa resmı aıyp taqty, dep habarlaıdy BBC.
Aıyptaýlar 1996 jyly gýmanıtarlyq uıymǵa tıesili eki ushaqtyń atyp túsirilýine baılanysty qozǵalǵan is aıasynda jarııalandy. Sol kezde tórt adam qaza tapqan.
AQSh-tyń bas prokýrory mindetin atqarýshy Todd Blansh Maıamıde ótken baspasóz máslıhatynda Raýl Kastro azamattardy óltirý maqsatyndaǵy sóz baılasýǵa qatysy bar dep aıyptalyp otyrǵanyn aıtty.
– Biz onyń óz erkimen kelýin nemese basqa jolmen jetkizilip, túrmege qamalýyn kútemiz, – dedi Todd Blansh.
BBC málimetinshe, 1996 jyly Kýba joıǵysh ushaqtary Brothers to the Rescue gýmanıtarlyq uıymynyń eki ushaǵyn atyp túsirgen. Ol kezde Raýl Kastro Kýbanyń qarýly kúshter mınıstri qyzmetin atqarǵan.
AQSh tarapy ony ushaqtardy joıý jáne tórt adamdy óltirý isine qatysy bar dep aıyptap otyr.
Sonymen qatar aıyp Kýbanyń taǵy bes azamatyna, onyń ishinde atalǵan ushaqtardy atyp túsirgen áskerı áýe kúshteriniń ushqyshtaryna da taǵylǵan.
Eger kinási dáleldense, Raýl Kastro ómir boıyna bas bostandyǵynan aıyrylýy múmkin.
Kýba prezıdenti Mıgel Dıas-Kanel X áleýmettik jelisindegi jazbasynda bul aıyptaýlardy «absýrd» jáne «saıası astary bar» dep atady.
– Bul – eshqandaı quqyqtyq negizi joq saıası sheshim. Onyń maqsaty – AQSh-tyń Kýbaǵa qarsy áskerı áreketin aqtaý úshin qoldan jasalǵan aıyptar qoryn tolyqtyrý, – dep jazdy ol.
Al AQSh prezıdenti Donald Tramp úkimettiń sheshimin qoldaıtynyn málimdedi. Alaıda ol jaǵdaıdy ýshyqtyrý qajet emes ekenin aıtty.
– Bul óte mańyzdy sát boldy dep esepteımin. Biraq shıelenis kúsheımeıdi. Menińshe, buǵan qajettilik joq, – dedi Tramp jýrnalısterge.
Aıta keteıik, buǵan deıin Pentagon Kýbaǵa qatysty yqtımal áskerı operatsııaǵa daıyndalyp jatqany habarlanǵan bolatyn.
