AQSh prokýratýrasy: Dıas Qadyrbaev 7 jyldan aspaıtyn merzimge sottalýy múmkin
ASTANA. QazAqparat - AQSh bıligi Bostondaǵy (Massachýsets shtaty) lańkestik aktini tergeýge kedergi jasady dep aıyptaǵan qazaqstandyq stýdent Dıas Qadyrbaev tergeýmen mámilege kelip, óziniń kinásin moıyndady, dep habarlady ITAR-TASS.
Prokýratýra ókilderi kelisim sharttaryna sáıkes olar Qadyrbaevtyń jeti jyldan aspaıtyn merzimge túrmege qamalýyna qol jetkizetinin kórsetti. Onyń advokattary ózderiniń qorǵaýyndaǵy adamnyń jazasyn budan da jeńildetýine qol jetkizýi múmkin.
Taraptar arasyndaǵy bul ýaǵdalastyqty isti júrgizip jatqan sýdıa Dýglas Výdlok maquldaýy tıis.
Boston soty Qadyrbaevtyń isi boıynsha úkimdi 18 qarashada jarııalaıdy dep málim etti Výdlok.
Qadyrbaevty ne úshin aıyptaýda
AQSh bıligi Boston lańkestik aktisin jasaýǵa aıyptalǵan Djohar Tsarnaevty biletin Qadyrbaev jáne Qazaqstannan taǵy bir stýdent Azamat Tájaıaqov jarylystan úsh kún ótken soń onyń prırotehnıka salynǵan sómkesin jáne notbýkti joıǵan dep sanaıdy. Bul lańkestik aktini tergeý isin edáýir qıyndatty. Jas adamdar buny Djohar Tsarnaev pen onyń aǵasy Tamerlannyń sýretterin jańalyqtardan kórgennen keıin jasady dep paıymdalýda.
Boston marafonyndaǵy lańkestik
2013 jylǵy 15 sáýirde Bostonnyń ortalyǵynda ótip jatqan dástúrli marafonnyń máresine jaqyn mańda arasyna 12 sekýnd salynyp, eki jarylys jasalǵan, onyń saldarynan úsh adam qaza tapty, 20-sy jaraqat aldy. Amerıkandyq bılik bul jarylystardy uıymdastyrýshylar jáne oryndaýshylar aǵaıyndy 26 jastaǵy Temirlan men 21 jastaǵy Djohar Tsarnaevtar ekenine senimdi. Lańkestikten keıin birneshe kún ótken soń Tamerlan polıtseılermen atys kezinde óltirildi, al Djohar oqtan jaraqattanyp, tutqyndaldy.
2013 jylǵy shildede Djohar Tsarnaevtyń isi boıynsha alǵashqy sot tyńdaýlary ótti. Ol ózine taǵylǵan aıyptyń 30 tarmaǵynyń birde-birin moıyndaǵan joq. Qańtarda prokýratýra oǵan ólim jazasy berilýin talap etetini jóninde habarlady. Sottyń bastalýy 3 qarashaǵa belgilenip otyr.
