AQSh professorlary «erte qartaıǵan» qazaq balasynyń dertin zertteýge daıyn
ASTANA. 11 qarasha. QazAqparat /Jasulan Amanbaıuly/ - AQSh-taǵy Dıýk ýnıversıtetiniń medıtsına jáne patologııa professory, Genomdy medıtsına ortalyǵynyń dırektory, Derbes medıtsına ortalyǵynyń atqarýshy dırektory Djefrı S. Gınsbýrg qazaqstandyq «erte qartaıǵan» bala 20 jasar Nurjan Órkeshbaevtyń dertin zertteýge daıyn.
Ol bul týraly búgin Astanada regeneratıvti medıtsına men adamnyń ómir súrý ýaqytyn uzartý taqyrybyna arnalǵan halyqaralyq konferentsııa barysynda málim etti.
«Kóptegen ǵylymı jańalyqtar, sátti zertteýler belgili bir sırek kezdesetin jaǵdaılarmen baılanysty bolyp keldi. Sondaı jaǵdaılardyń biri tez qartaıǵan balanyń basynan keship otyrǵan aýrýy da bolýy múmkin. Árıne, eger sondaı múmkindigimiz bolyp jatsa, atalǵan jaǵdaı bizdiń ǵylymı zertteýimizdiń nysany bola alady», - dedi Djefrı S. Gınsbýrg.
Eske sala keteıik, 1991 jyly Atyraý oblysy Qyzylqoǵa aýdanynyń Muqyr eldi mekeninde týǵan Nurjan Órkeshbaevtiń betinde ájim alty jasynan bastap paıda bola bastaǵan. Densaýlyǵy kúrt nasharlap, jıi aýratyn bolǵan. Buqaralyq aqparat quraldaryndaǵy kóptegen jarııalanymdardan keıin oǵan Qazaqstannyń ǵana emes, Reseı men Germanııanyń dárigerleri nazar aýdara bastaǵan bolatyn, alaıda ázirge onyń dertine shıpa tabylmady. Medıtsınalyq konsılıýmnyń sheshimi boıynsha, oǵan progerııa, nemese teriniń merziminen buryn qartaıýy sındromy dıagnozy qoıyldy.
