AQSh prezıdenttigine saılaý jarysynan taǵy bir úmitker shyǵyp qaldy
ASTANA. KAZINFORM – Arkanzas shtatynyń burynǵy gýbernatory Eısa Hatchınson AQSh prezıdenti laýazymyna saılaýaldy jarystan bas tartatynyn málimdedi. Bul týraly «Amerıka daýysy» habarlady.
Arkanzas shtatynyń burynǵy gýbernatory, Respýblıkashyldar partııasynan prezıdenttikke úmitkerlerdiń biri Eısa Hatchınson seısenbi kúni saılaýshylardyń jetkilikti qoldaýyna ıe bola almaǵandyqtan saılaýaldy dodadan shyǵyp qaldy.
Sáýirde 2024 jyly Respýblıkashyldar atynan kandıdatýrasyn usynatynyn jarııalaǵan Hatchınson saýalnamalarda eshqashan bir paıyzdyq tarmaqtan joǵary kóterilmedi jáne qyrkúıektegi partııanyń ekinshi debatyna ótpedi.
Hatchınson Donald Tramptyń kandıdatýrasyna qarsy shyǵyp, burynǵy prezıdent 2021 jyly 6 qańtarda óz jaqtastarynyń Kapıtolııge jasaǵan shabýyly úshin «mańyzdy jaýapkershilikti» moınyna alady jáne qaıta prezıdent bolýǵa quqy joq dep málimdedi.
Hatchınson 2015 jyldan bastap 2023 jyldyń basyna deıin Arkanzas gýbernatory qyzmetin atqardy. Buǵan deıin ol federaldy prokýror boldy, Ókilder palatasynda úsh merzimge saılanyp, Djordj Býsh ákimshiliginde joǵary laýazymdardy atqardy.
Esterińizge sala keteıik, keshe AQSh prezıdenttigine Respýblıkashyldar partııasynan úmitker Vıvek Ramasvamı de saılaýǵa qatysýdan bas tartqan bolatyn.
AQSh-taǵy saılaý 2024 jyldyń 5 qarashasyna belgilengen. Donald Trampqa prezıdenttik saılaýǵa qatysýǵa ruqsat berildi. Mıchıgan shtatynyń soty onyń shtattaǵy negizgi bıýlletende qalýy týraly sheshim shyǵardy.
