AQSh prezıdentiniń uly zańsyz qarý saqtaǵany úshin kináli dep tanyldy

ASTANA. KAZINFORM – AQSh prezıdentiniń uly Hanter Baıden qarýdy saqtaý erejelerin buzǵany úshin kináli dep tanyldy. Ol 25 jylǵa deıin bas bostandyǵynan aıyrylýy múmkin. 

Qazylar alqasy AQSh prezıdentiniń uly Hanter Baıdendi qarýdy saqtaý erejesin buzdy dep tapty, dep habarlaıdy CNN.

Amerıka tarıhynda alǵash ret el basqaryp turǵan prezıdenttiń balasyna aýyr qylmys jasady degen aıyp taǵylyp otyr.

Prokýrorlardyń aıtýynsha, 54 jastaǵy Hanter Baıden 2018 jyly tapansha satyp alǵan kezde tizilimge jalǵan aqparat kórsetken. Atap aıtqanda, ol ótinish blankilerine óziniń nashaqorlyqqa táýeldigi týraly jalǵan aqparat bergen.

Keıinirek Hanter qarýdan qutylý úshin ony tastaı salǵan. Qarý Delaver shtatynyń Grınvıll qalasyndaǵy azyq-túlik dúkeninen tabylǵan. Osylaısha tergeý bastaldy. Aqyrynda tergeýshiler prezıdenttiń balasy satyp alý kezinde toltyrǵan qujatqa toqtaldy.

Hanter 25 jylǵa deıin bas bostandyǵynan aıyrylýy jáne 750 000 dollarǵa deıin aıyppul tóleýi múmkin, biraq CNN eń joǵary jazany ekitalaı dep ataıdy, óıtkeni bul — onyń birinshi aýyr qylmys úshin sottalýy.

Sot úkimi áli belgilengen joq, biraq ol ádette 120 kún ishinde, ıaǵnı qazan aıynyń ortasynda jarııalanady.

Djo Baıden sot úkimine reaktsııa bildirip, nashaqorlyqqa táýeldiligin jeńgen ulyn qoldady.

– Men prezıdentpin, biraq, sonymen qatar ákemin. Djıl ekeýmiz ulymyzdy jaqsy kóremiz jáne búgin ony maqtan tutamyz... Men bul istiń nátıjesin qabyldaımyn jáne Hanterdiń apellıatsııalyq shaǵymyn qarastyrǵan sátte sot protsesin qurmetteımin, – dedi ol.