AQSh prezıdentiniń arnaıy ókili Reseıge keldi
MÁSKEÝ.KAZINFORM - AQSh prezıdentiniń arnaıy ókili Stıv Ýıtkoff Osloda Ýkraına jáne Eýropa taraptarymen kelissózder ótkizgennen keıin Sankt-Peterbýrgke keldi. Onyń Reseı prezıdenti Vladımır Pýtınmen kezdesýi josparlanǵan, dep habarlaıdy agenttik tilshisi.
Flightradar24 servısiniń málimetinshe, Oslodan ushyp shyqqan Bombardier ushaǵy Pýlkovo-3 áýejaıyna qonǵan. Amerıkalyq ókildi Reseı prezıdentiniń shet memlekettermen ınvestıtsııalyq-ekonomıkalyq yntymaqtastyq jónindegi arnaıy ókili, Reseıdiń Tikeleı ınvestıtsııalar qorynyń basshysy Kırıll Dmıtrıev qarsy aldy. Keıin olar áýejaıdan birge ketken.
20 qazanda Stıv Ýıtkoff Osloda Ýkraına prezıdenti Vladımır Zelenskıımen, Norvegııa premer-mınıstri Ionas Gar Steremen jáne Fınlıandııa prezıdenti Aleksandr Stýbbpen kelissózder ótkizdi. Kezdesýde Reseı men Ýkraına arasyndaǵy qaqtyǵysty retteý jáne Eýropanyń bolashaq qaýipsizdik arhıtektýrasyn qalyptastyrý máseleleri talqylandy.
21 qazan kúni tańerteń AQSh Memlekettik hatshysy Marko Rýbıo Ýıtkofftyń Reseıge jol tartqanyn rastady. Onyń aıtýynsha, arnaıy ókildiń Zelenskıımen kezdesýi syndarly ótken. Sondaı-aq Ýıtkoff Reseıge Ýkraına tarapymen talqylanǵan usynystardy jetkizedi.
Buǵan deıin sheteldik BAQ Oslodaǵy kelissózderde Ýkraınanyń uzaq merzimdi damý perspektıvalary, sonyń ishinde qaýipsizdik kepildikteri, Eýropamen ıntegratsııa, ekonomıkany qalpyna keltirý jáne ınvestıtsııa tartý máseleleri de qaralǵanyn habarlaǵan. Kelissózderdiń taǵy bir bóligi Reseı men Eýropa arasyndaǵy qarym-qatynastarǵa jáne jańa qaýipsizdik arhıtektýrasyn qalyptastyrý tásilderine arnaldy.
Reseı prezıdentiniń baspasóz hatshysy Dmıtrıı Peskov buǵan deıin Máskeý AQSh prezıdentiniń arnaıy ókilderimen Vladımır Pýtınniń jaqyn arada kezdesýin kútetinin málimdegen.
Onyń aıtýynsha, taraptar amerıkalyq ókilderdiń Ýkraına jáne Eýropa taraptarymen ótkizgen kezdesýleriniń qorytyndylaryn talqylap, basqa da mańyzdy máseleler boıynsha ustanymdarymen almasýdy josparlap otyr.
Stıv Ýıtkofftyń Vladımır Pýtınmen buǵan deıingi kezdesýi qyrkúıek aıynyń basynda Máskeýde ótken.
Aıta keteıik, osyǵan deıin AQSh Memlekettik hatshysy Marko Rýbıo Ózbekstanǵa bardy.
