AQSh prezıdentiniń arnaıy ókili Máskeýge keldi

ASTANA. KAZINFORM — Reseı prezıdenti Vladımır Pýtınmen kelissózder ótkizý úshin AQSh prezıdentiniń arnaıy ókili Stıv Ýıtkoff Máskeýge keldi. Bul týraly Kremldiń resmı saıty habarlady.

Reseı prezıdenti Vladımır Pýtın Máskeýge kelgen amerıkalyq kóshbasshynyń arnaıy ókili Stıven Ýıtkoffpen jáne kásipker Djared Kýshnermen kezdesý ótkizdi.

Reseı basshysy bul kezdesý týraly RF Qaýipsizdik keńesiniń turaqty múshelerimen ótken jedel keńes barysynda málimdedi. Onyń aıtýynsha, ol Palestına prezıdenti Mahmýd Abbaspen kezdesýden keıin AQSh ókilderimen júzdesýdi josparlaǵan.

Reseı prezıdentiniń baspasóz hatshysy Dmıtrıı Peskov ta Stıv Ýıtkoff pen Djared Kýshnerdiń aldaǵy sapary týraly habarlady. Kelissózderdiń negizgi kún tártibi — Ýkraınadaǵy qaqtyǵysty retteý jáne soǵan baılanysty ózge de máseleler bolmaq.

Bul — amerıkalyq ókildiń Reseı basshysymen kelissózder júrgizý maqsatyndaǵy Máskeýge jetinshi sapary, al Kýshner úshin ekinshi ret kelýi. Ýıtkofftyń buǵan deıingi sapary ótken jylǵy 2 jeltoqsanda bolǵan. Ol kezde Pýtınmen ótken kezdesýdiń nátıjeleri týraly resmı aqparat taratylmaǵan edi.

Aıta keteıik, buǵan deıin AQSh prezıdentiniń arnaıy ókili Ýkraına kelissózderindegi ilgerileý 90%-dan asqanyn aıtqan edi. 

Al Zelenskıı AQSh, Ýkraına jáne Reseı arasyndaǵy kelissózder BAÁ-de ótetinin málimdedi.