AQSh prezıdentiniń uly Hanter Baıden 25 jylǵa túrmege qamalýy múmkin

Prezıdent Djo Baıdenniń uly – Hanterge 2018 jyly qarý satyp alý kezinde jalǵan málimet bergeni úshin úsh epızod boıynsha aıyp taǵylyp otyr, dep habarlaıdy QazAqparat CNN agenttigine silteme jasap.

AQSh tarıhynda alǵash ret Ádilet mınıstrligi bılik basyndaǵy prezıdenttiń ulyna aıyp taqty.

Hanter Baıdenniń kinásin moıyndaý týraly sotpen alǵashqy kelisimi shildede buzylǵannan keıin oǵan osyndaı aıyp taǵyldy. Djo Baıden 2024 jyly AQSh prezıdenti bolyp qaıta saılaný úshin saılaýaldy naýqan kezinde bul jaǵdaı kúrdeli sot isine ulasýy múmkin.

Hanter Baıden 2018 jyldyń qazanynda Delaver shtatyndaǵy qarý-jaraq dúkeninen revolver satyp alyp jatqanda tyıym salynǵan esirtki zattaryn paıdalanbaıtynyn jáne oǵan táýeldi emes ekenin aıtyp, jalǵan málimet bergen. Shyn máninde, ol sol kezde kokaınge táýeldilikpen kúresip jatqan bolatyn.

Qarý satyp alar kezde jalǵan aqparat berý federaldyq qylmysqa jatady. Hanter Baıdenniń kinási dáleldenip jatsa, 25 jylǵa deıin túrmege qamalýy múmkin.

AQSh-tyń Ókilder palatasynyń bastamasymen uly Hanterdiń kásipkerlik qyzmetine baılanysty Djo Baıdenge qatysty tergeý bastaldy. Bul jaǵdaı prezıdentke ımpıchment jarııalaýǵa ákep soqtyrýy múmkin ekenin habarlaǵan edik.

CNN-niń jazýynsha, buryn ózine de tórt ret aıyp taǵylǵan AQSh-tyń burynǵy prezıdenti Donald Tramp Hanter Baıden týraly jańalyqqa «qaıǵyly jaǵdaı» dep pikir bildirdi.

«Bul – qaıǵyly jaǵdaı, men mundaıǵa eshkim qýanbaýy kerek ekenin aıtqym keledi», - dep málimdedi Tramp NBC News-ke.