AQSh prezıdentiniń burynǵy kómekshisi Zbıgnev Bjezınskıı qaıtys boldy
ASTANA. QazAqparat - 1977-1981 jyldary AQSh prezıdenti Djımmı Karterdiń ulttyq qaýipsizdik jónindegi kómekshisi Zbıgnev Bjezınskıı juma kúni, 89 jasqa qaraǵan shaǵynda kóz jumdy. Bul týraly amerıkalyq Fox News telearnasy habarlady. TASS.
Amerıkalyq Politico gazeti qyzy Mıkaǵa silteme jasap, belgili amerıkalyq saıasatkerdiń qaıtys bolǵanyn habarlady. «Ákem búgin keshke únsiz ǵana fánıden baqıǵa attanyp ketti», - degen onyń sózin keltirdi basylym.
The New York Times gazetiniń aqparatyna sáıkes, saıasatker Vırdjınııa shtatynda aýrýhanada kóz jumdy. Zbıgnev Bjezınskıı - amerıkalyq saıasatker, áleýmettanýshy, memleket qaıratkeri, AQSh syrtqy saıasatynyń jetekshi ıdeologtarynyń biri. Sońǵy jyldary oqytýshylyq, konsýltatıvtik qyzmetterdi belsendi atqardy, birqatar qoǵamdyq uıymdardy basqardy, birneshe qorlar men kompanııalardy basqardy, televıdenıede saıası baǵdarlamalardyń júrgizýshisi boldy. Vashıngtonda Strategııalyq jáne halyqaralyq zertteýler ortalyǵynyń sarapshysy boldy.
Djons Hopkıns Ýnıversıtetiniń janynda Pol Nıttse atyndaǵy tereńdetilgen halyqaralyq zertteý mektebinde sabaq berdi. Іri saıası qaıratkerlerdi, transulttyq korporatsııa basshylaryn, ekonomıster men saıasatkerlerdi biriktiretin elıtaly «Bılderberg klýbynyń» turaqty múshesi boldy.
