AQSh prezıdenti óz ákimshiliginiń basty jetistikterin jarııalady
VAShINGTON. QazAqparat - AQSh prezıdenti Donald Tramp jyl saıynǵy «Eldiń jaǵdaıy týraly» baıandamasynda el basshysy retindegi birinshi jylynyń basty jetistikterin atady, dep habarlaıdy «QazAqparat» HAA tilshisi Aq úıdiń baspasóz qyzmetine silteme jasap.
Tramp óz ákimshiliginiń aıaqtalǵan jyldaǵy basty jetistikteri retinde respýblıkashyldar usynǵan salyq salýdy tómendetý týraly zań jobasyn, densaýlyq saqtaý salasyndaǵy reformany, sondaı-aq DAISh-ke qarsy kúrestegi jetistikterdi atady.
Aq úı basshysy prezıdenttik merziminiń ekinshi jylynda ımmıgratsııa jáne ınfraqurylym sekildi ózekti máseleler jóninde demokrattarmen ymyraǵa kelýge ázir ekenin aıtty.
Tramp eńbekke jegilgen balalarǵa, sondaı-aq Amerıkada buryn umyt bolǵan qaýymdarǵa adaldyǵy men aıanyshyn bildirip, únemi qamqor bolatynyn aıtty.
AQSh prezıdenti Soltústik Koreıanyń ıadrolyq qarý máselesindegi jaýapsyzdyǵy jýyq arada Qurama Shtattarǵa qaýip tóndirýi múmkin ekenin, alaıda qazirgi ákimshilik oǵan jol bermeýdiń bar amalyn qarastyratynyn tilge tıek etti.
Lańkestikke qarsy kúres jaıly aıta kele, Donald Tramp AQSh qorǵanys mınıstri Djeıms Mettıske lańkesterge qatysty ustaý saıasatyn qaıta qaraýdy jáne Gýantanamodaǵy bazany jappaýdy tapsyrǵanyn málimdedi.
Aq úı basshysy eki partııany da ınfraqurylym jobalary salasynda yntymaqtastyq etýge shaqyrdy.
«Biz Amerıkanyń eń gúldengen kezeńindemiz. Amerıka armanymen ómir súre bastaý úshin buǵan deıin qolaıly kezeń bolǵan emes. Amerıkalyqtar endi ózderine, AQSh-qa senip, qarymdy eńbek etse, qalaýynsha ómir súre alady», - dedi ol.
Seısenbi kúni eldiń aldyńǵy qatarly telejýrnalısterimen suhbat kezinde Tramp prezıdent oryntaǵyndaǵy basty umtylysy Amerıka halqynyń birligine qol jetkizý ekenin aıtqan bolatyn.
