AQSh Prezıdenti Meksıkamen shekaraǵa alyp qorǵan turǵyza bastady
ASTANA. QazAqparat - AQSh Prezıdenti Donald Tramp eldiń Meksıkamen shekarasynda qorǵan turǵyzý jarlyǵyna qol qoıdy.
Osylaısha, Tramp óziniń saılaýaldy ýádeleriniń birin oryndaýǵa kiristi. Prezıdenttik kresloǵa otyrǵan 5 kúnniń ishinde AQSh-tyń jańa prezıdenti óziniń saıası baǵdarlamasynyń taǵy eki tarmaǵyn iske asyryp úlgerdi: Tynyq muhıty seriktestigi týraly kelisimniń kúshin joıý jáne Obamacare dep atalatyn densaýlyq saqtaý reformasyn toqtatatyn protsedýrany iske qosý. Bul týraly russian.rt.com saıtynda habarlandy.
Amerıka qurama shtattarynyń 45-inshi prezıdenti el shekaralarynda qaýipsizdikti kúsheıtý týraly jarlyqqa qol qoıdy. Qujattarda sondaı-aq zańsyz mıgranttarmen jáne qylmyspen kúresý úshin Meksıkamen shekarada qabyrǵa turǵyzý jarlyǵy qamtylǵan.
Donald Tramp Meksıkamen shekarada qabyrǵa turǵyzatyndyǵyn jáne ony Meksıka esebinen iske asyratynyn buǵan deıin birneshe márte aıtqan bolatyn. Bul onyń saıası baǵdarlamasynyń basty jáne eń daýly bóligi bolyp tabylady.
Eske salaıyq,3145 shaqyrymǵa sozylǵan atalmysh elmen shekara Qurama Shtattardyń ishki saıasaty úshin Donald Trampqa deıin ózekti problemaǵa aınalǵan edi. 1980-jyldarǵa deıin ol múldem derlik qorǵalmady, bul kontrabandashylarǵa qolaıly bolyp keldi.
1993 jyly Bıll Klınton tusynda eki el shekarasyna kedergi turǵyzyla bastady jáne ol 2000 jylǵa deıin jalǵasty. Bul ýaqyt ishinde Kalıfornııa men Meksıka shekarasynyń barlyq boıyna dýal turǵyzyldy.
2006 jyly Djord Býsh-kishiniń jarlyǵymen shekara boıynda taǵy 900 shaqyrymdyq kedergi turǵyzyldy. Degenmen, 2 myńnan astam aýmaq ashyq kúıinde qaldy. Búginde eki el arasyndaǵy shekarany ondaǵan myń amerıkalyq shekarashy kúzetedi, biraq Vashıngtonda zańsyz mıgratsııa máselesi ózekti kúıinde qalyp otyr.
1970 jyldan bastap Meksıkadan AQSh-qa 12 mln.-nan astam adam kóship kelgen. Onyń jartysynan astamy - zańsyz.
