AQSh prezıdenti gaz baǵasyn tómendetý úshin asa iri kólemde munaı shyǵaratynyn málimdedi
NUR-SULTAN. QazAqparat – AQSh gaz baǵasyn tómendetý jáne eldegi ınflıatsııamen kúresý úshin strategııalyq qordan kúnine 1 mln barrel munaı bólip otyrady, dep habarlaıdy QazAqparat tilshisi.
Baıden ákimshiligi taratqan aqparatqa sáıkes, AQSh prezıdenti aldaǵy alty aı boıy strategııalyq qorǵa qol salmaq. Sebebi, otandyq óndirýshiler gaz óndirýdi arttyryp jatyr.
«Bunyń aýqymy teńdessiz: álemde mundaı ýaqyt aralyǵynda kúnine 1 mıllıon barrel munaı qoryn shyǵarý eshqashan bolǵan emes. Osy rekordtyq munaı shyǵarý tarıhı kólemge qol jetkizip, jyldyń aıaǵyna deıin ishki óndiris jandanǵansha jaǵdaıdy ustap turýǵa múmkindik beredi», -delingen Aq úıdiń baspasóz relızinde.
Aıta keteıik, beısenbi kúni munaı baǵasy tómendedi. Brent markaly munaıdyń mamyr aıyna fıýchersteri 4%-ke barreline 108,89 dollarǵa deıin azaıdy.
Amerıka munaıy da arzandap, keshegi sessııa barysynda 100,16 dollar deńgeıinde satyldy.
Bul mádimdemeni Aq úı Reseıdiń Ýkraınadaǵy arnaıy operatsııasyna baılanysty energııa kózderiniń kúrt qymbattaýyna qarsy amaldar qarastyryp jatqan kezde jasady.
Geosaıası jaǵdaı ýshyqqan saıyn munaı men tabıǵı gaz baǵasy kóterilip, olardyń qoljetimdi bolýy alańdaýshylyq týǵyzyp otyr.
Shıki munaı baǵasynyń ósýi AQSh-ta benzınniń qymbattaýyna ákep soqtyrdy. Bir gallon benzın baǵasy 4,23 dollarǵa jetti, bir jyl buryn ol 2,87 dollar turǵan edi. Bul barlyq taýarlardyń qymbattaýyna, jyldyq ınflıatsııanyń 7,9% deıin kóterilýine alyp keldi.
Wells Fargo Securities energetıka jónindegi aǵa sarapshysy Rodjer Rıdtiń aıtýynsha, Baıden josparlap otyrǵan strategııalyq qordan alynatyn kólem kúndelikti álemdegi munaı óndirisiniń 1% jáne AQSh tutynatyn munaıdyń 5%-n quraıdy.
