«AQSh prezıdenti arnaıy shaqyrtý jiberipti» respýblıkalyq basylymdarǵa sholý

Keshe Aqordada Prezıdent janynan jańadan qurylǵan Jappaı qyryp-joıý qarýyn taratpaý jónindegi komıssııa óziniń tuńǵysh otyrysyn ótkizdi. Osy alqaly jıyn arqaý bolǵan maqala «Aıqyn» gazetiniń búgingi sanynda «AQSh prezıdenti arnaıy shaqyrtý jiberipti» degen taqyryppen jaryq kórdi. Basylymnyń jazýynsha, jıynǵa tóraǵalyq jasaǵan Memlekettik hatshy - Syrtqy ister mınıstri Qanat Saýdabaev AQSh Prezıdenti Barak Obama Elbasy Nursultan Nazarbaevtan bıylǵy jyldyń sáýir aıynda Vashıngtonda ótetin ıAdrolyq qaýipsizdik jónindegi jahandyq sammıtke qatysýyn surap, jeke shaqyrtý jibergenin jarııalaǵan. «Bul elimizdiń joǵary mártebesi men bedeliniń kýási bolyp tabylady!», dep atap kórsetken Q.Saýdabaev.

Komıssııanyń alǵashqy otyrysy jaıynda egjeı-tegjeıli jazylǵan maqala «Kazahstanskaıa pravda» gazetinde de jaryq kórdi. Alqaly jıyn barysynda Memlekettik hatshy - Syrtqy ister mınıstri Qanat Saýdabaev komıssııanyń Qazaqstannyń EQYU-ǵa tóraǵalyǵynyń bastalýymen birge elimizdiń halyqaralyq sahnadaǵy jaýapkershiligi artqan kezde qurylýynyń úlken saıası máni barlyǵyn atap ótken.

«Bıyl Aral teńiziniń tartylýy kesirinen ańqasy keýip, shól dalaǵa aınalǵan Qyzylorda óńirindegi qýań jerlerdi qaıta qalpyna keltirý qolǵa alynatyn boldy. Keshe Úkimet basshysynyń qatysýymen ótken Qorshaǵan ortany qorǵaý mınıstrliginiń alqa májilisinde elimizdiń «bas ekology» Nurǵalı Áshimov osy jańalyqty jarııa etti», dep jazady «Aıqyn» gazeti. Basylymnyń jazýynsha, mınıstrlik elordada nemistermen birge sýdyń sapasyn baǵalaıtyn zamanaýı zerthana salmaq. Qazir onyń tehnıkalyq-ekonomıkalyq negizdemesi ázirlenýde. Alqa májilisinde aıtylǵan jaıttarmen «Qaraýsyz jatqan jerler qalpyna keltirildi» atty maqaladan egjeı-tegjeıli tanysa alasyzdar.

Qazaqstan táýelsiz memleket atandy. Endigi kezekte ulttyq arman ózgerdi me? Búgingi tańda ultymyzdyń basyn biriktiretin jalpyulttyq arman nede? «Aıqyn» gazetiniń bul saýaldaryna saıasattanýshy Nurmuhamed Baıǵaraev, saıasatker Dos Kóshim, zańger Ábdiqahar Seıitjanov, tarıhshy Baqyt Ejenhanuly, kásipker Azat Qonysbek jaýap bergen.

QR Prezıdenttik «Bolashaq» baǵdarlamasynyń eń jas stıpendıaty, Italııanyń Mılan qalasyndaǵy Joǵary mýzyka akademııasynyń jáne Djýzeppe Verdı atyndaǵy memlekettik konservatorııanyń eń jas stýdenti Marııa Mýdrıakpen aradaǵy suhbat «Nur Astana» basylymynyń «Zamandas» aıdarynda jaryq kórdi. «La Skalada áli talaı án shyrqaımyn» degen taqyryppen berilgen ekeýara áńgimeniń tolyq nusqasyn basylymnyń búgingi nómirinen oqı alasyzdar.

«Aǵymdaǵy jyly elimiz boıynsha júzege asyrylatyn sharalar ishinde Astana ómirine tikeleı qatystylarynyń biri - Azııadaǵa ázirlik. Aýqymdy jarys aldyndaǵy jumystar Týrızm jáne sport mınıstrliginiń keńeıtilgen alqa májilisinde pysyqtaldy», dep jazady «Astana aqshamy» gazeti. Basylymnyń jazýynsha, Azııadaǵa qatysý úshin 11 sport túrinen 156 sportshy-kandıdat iriktelgen. Olar búginde 122 halyqaralyq jarysta, sondaı-aq elimizdegi jáne shet elderdegi 177 oqý-jattyǵý saıystarynda baq synaǵan. Maqala «Azııadaǵa ázirlik aıasynda» degen taqyryppen basylǵan.

«Astana aqshamy» gazetiniń beısenbilik nómirinde Elordanyń Saryarqa, Esil, Almaty aýdandary ákimderiniń halyq aldyndaǵy eseptik kezdesýlerine oraı maqalalar jaryq kórdi.

Aýdan ákimderiniń halyq aldyndaǵy kezekti eseptik kezdesýleri «Vechernıaıa Astana» gazetiniń de nazarynan tys qalmaǵan.

«Keshe Qorshaǵan ortany qorǵaý mınıstrliginiń alqa májilisinde onyń basshysy Nurǵalı Áshimov pen QR Premer-Mınıstri Kárim Másimov elimizdiń halyq sharýashylyǵyn damytýdaǵy birqatar mańyzdy jobalardy belgiledi», dep jazady «Lıter» gazeti.

Qoqys óńdeý, sý resýrstaryn tıimdi paıdalaný jáne ekologııa máseleleri mańyzdy baǵyttar bolyp sanalady. Osyǵan oraı taıaý ýaqytta Qazaqstanda «Jasyl damý» óndiris jáne tutyný qaldyqtaryn basqarýdyń ulttyq ortalyǵy qurylady. Ortalyqtyń negizgi maqsaty - tabıǵatty qorǵaý sharalaryn iske asyrý, qorshaǵan ortany qorǵaý salasynda kásipkerlik ortany damytý, ekologııalyq ınnovatsııany endirý, tehnologııalyq keshender jáne ekologııalyq jabdyqtar óndirý boıynsha zaýyttar qurý.

Osy taqyrypqa arnalǵan maqalalar «Ekspress K», «Izvestııa» jáne «Vechernıaıa Astana» gazetterinde de jaryq kórdi.

«Ekspress-K» gazetiniń jazýynsha, tikeleı sheteldik ınvestıtsııanyń kólemi 2008 jylmen salystyrǵanda 2009 jyly 38,7 paıyzǵa qysqaryp, 1,69-dan 1,04 trln. dollarǵa tómendegen. Mundaı statıstıka Saýda jáne damý jónindegi BUU komıssııasy keshe taratqan baıandamada keltirilgen.