AQSh prezıdenti Ózbekstandy Beıbitshilik keńesine qosylýǵa shaqyrdy
TAShKENT. KAZINFORM — AQSh Prezıdenti Donald Tramp Ózbekstan basshysy Shavkat Mırzıeevke hat joldap, Gaza boıynsha qurylatyn Beıbitshilik keńesine qosylýǵa shaqyrdy, dep habarlaıdy Kazinform agenttiginiń menshikti tilshisi.
Muny Ózbekstan prezıdentiniń baspasóz hatshysy Sherzod Asadov málim etti. Ol atap ótkendeı, bul bastama byltyr qyrkúıekte jarııalanǵan Gazadaǵy qaqtyǵysty toqtatý jónindegi keshendi josparmen, sondaı-aq BUU Qaýipsizdik Keńesiniń 2025 jylǵy 17 qarashadaǵy №2803 qararymen maquldanǵan.
— Bastamanyń negizgi maqsaty — beıbitshilikti, turaqtylyq pen qaýipsizdikti qamtamasyz etý úshin ózine jaýapkershilik alýǵa daıyn memleketterdi biriktire otyryp, jańa halyqaralyq qurylym jasaqtaý, - dep málimdedi Sherzod Asadov.
Sondaı-aq, Donald Tramp Ózbekstandy Beıbitshilik keńesine quryltaıshy memleket retinde qosylýǵa shaqyrdy. Óz kezeginde Shavkat Mırzıeev amerıkalyq áriptesine Ózbekstannyń bul bastamaǵa qosylýǵa daıyn ekendigin bildirip, hat joldady.
Eske salaıyq, buǵan deıin Donald Tramp Memleket basshysy Qasym-Jomart Toqaevty Gaza boıynsha qurylatyn Beıbitshilik keńesiniń quramyna kirýge resmı shaqyryp, al Qazaqstanǵa quryltaıshy memleketterdiń biri bolýdy usynǵan edi.