AQSh prezıdenti qoly ne úshin kógergenin túsindirdi
ASTANA. KAZINFORM — AQSh prezıdenti Donald Tramp dárigerler usynǵan mólsherden joǵary dozada aspırın qabyldaıtynyn, sonyń saldarynan qoldary kógergenin aıtty, dep Kazinform agenttiginiń menshikti tilshisi.
— Aspırın qandy suıyltady deıdi, al men qoıý qannyń júregime quıylǵanyn qalamaımyn. Sondyqtan men úlken bir tabletka ishemin. Muny kóptegen jyldar boıy jasap kelemin, sonyń áserinen qolym kógerip ketedi, — dedi Donald Tramp The Wall Street Journal basylymyna bergen suhbatynda, qoldaryndaǵy jıi baıqalatyn kógerýlerge túsinik bere otyryp.
Tramptyń jeke dárigeri, AQSh Áskerı-teńiz kúshteriniń kapıtany Shon Barbabella jýrnalǵa prezıdenttiń júrek-qantamyr aýrýlarynyń aldyn alý maqsatynda kúnine 325 mg aspırın qabyldaıtynyn habarlady.
Aspırın antıkoagýlıant retinde áser etedi, ıaǵnı qan uıýynyń aldyn alady. Al júrekke túsken trombtar ınfarktqa ákelýi múmkin.
— Prezıdent Tramptyń medıtsınalyq tekseristeri men zerthanalyq taldaýlary onyń zat almasý júıesiniń óte jaqsy kúıde ekenin kórsetip otyr. Júrek-qantamyr júıesiniń jaǵdaıy ony jasynan 14 jasqa jas kórinetindeı deńgeıde dep baǵalaýǵa múmkindik beredi. Jalpy alǵanda, prezıdenttiń densaýlyǵy óte jaqsy, ári ol Bas qolbasshy retindegi mindetterin tolyq atqarýǵa qabiletti, — dedi Aq úıdiń dárigeri Shon Barbabella.
Sondaı-aq Barbabella prezıdentte «betkeılik sozylmaly venozdyq jetkiliksizdik» dep atalatyn aýrý bar ekenin, sonyń saldarynan bıylǵy jyldyń basynda onyń baltyrlary isingenin málimdedi.
Suhbat barysynda Tramp bul máseleni sheshý úshin kompressııalyq shulyq kıgenin, biraq «olar unamaǵandyqtan» keıin laqtyryp tastaǵanyn aıtty.
Tramp óz sózinde: «Meniń densaýlyǵym tolyqtaı jaqsy», — dep málimdedi. Sonymen qatar, AQSh prezıdenti golf oıynyn erekshe jaqsy kóretinin, alaıda golf alańynan tys jerde sportpen aınalyspaıtynyn atap ótti.
Buǵan deıin Donald Tramptyń 2025 jyldyń qazan aıynda júrek pen ishek-qurylysyna magnıttik-rezonanstyq tomografııa (MRT) jasatqany habarlanǵan bolatyn.
Donald Tramp ózine qandaı ýáde berdi, myna siltemeden oqyńyz.
