AQSh prezıdenti Izraılge jasalǵan lańkestik áreketti aıyptady

Senbi kúni AQSh prezıdenti Djo Baıden Izraılge jasalǵan lańkestik áreketti aıyptap málimdeme jasady. QazAqparat tilshisi bul týraly Aq úıge silteme jasap habarlaıdy.

Senbi kúni tańerteń Dj. Baıden men Izraıl premer-mınıstri B.Netanıahý Izraıldegi jan túrshigerlik qarýly shabýyldar týraly telefon arqyly sóılesti.

Baıden Qurama Shtattar HAMAS lańkesteriniń Gazadan Izraılge jasaǵan osy jan túrshigerlik shabýylyn sózsiz aıyptaıtynyn atap ótip, premer-mınıstr Netanıahýǵa Aq úıdiń Izraıl úkimeti men halqyna barlyq tıisti qoldaý quraldaryn usynýǵa daıyn ekenin aıtty. Málimdemede «terrorızm eshqashan aqtala almaıdy. Izraıldiń ózin jáne halqyn qorǵaýǵa quqyǵy bar» delingen.

AQSh Izraılmen dushpandyq qarym-qatynastaǵy kez kelgen úshinshi tarapqa jaǵdaıdy óz paıdasyna sheshýge jol bermeıtinin eskertti. Baıden óz ákimshiliginiń Izraıldiń qaýipsizdigin tabandy túrde qoldaıtynyn málimdedi.

AQSh basshysy birinshi hanym Djıll ekeýi osy zorlyq-zombylyqtan zardap shekken barlyq otbasylar úshin duǵa etetinin aıtty.

«Qaıǵyly qazaǵa júregimiz aýyryp, zardap shekkenderdiń barlyǵynyń tezirek saýyǵyp ketýine úmit artamyz», - dedi Djo Baıden málimdemesinde.

AQSh úkimeti Izraıldegi jaǵdaıdy jiti baqylap otyr jáne premer-mınıstr B.Netanıahýmen tyǵyz baılanysta bolady.