AQSh prezıdenti Djo Baıden Izraılge bardy

AQSh prezıdenti Djo Baıden mingen ushaq Izraılge jergilikti ýaqyt boıynsha saǵat 11:01-de qondy. Kazinform agenttigi bul týraly CNN telearnasyna silteme jasap habarlaıdy. 

Ushaqtan túsken prezıdent Baıden Izraıl premer-mınıstri Bınıamın Netanıahý men Izraıl prezıdenti Isaak Gertsogty qushaqtap, AQSh elshiliginiń ýaqytsha senimdi ókili Stefanı Halletpen qol alysyp, amandasty.

Kırbıdiń jýrnalısterge habarlaýynsha, Baıden óz saparyn premer-mınıstr Bınıamın Netanıahýmen kezdesýden bastap, odan keıin Izraıldiń áskerı kabınetimen kezdesý ótkizedi.

«Ol birneshe kúrdeli suraq qoıady. Sonyń ishinde Izraıldiń bolashaq josparlary týraly suraqtar bar», - dedi Kırbı.

Kırbıdiń sózinshe, Prezıdent Baıden qaqtyǵystyń ýshyǵýyn qalamaıtynyn, Gaza sektoryndaǵy gýmanıtarlyq jaǵdaıdy, sondaı-aq tutqyndar máselesin sheshýge nıetti ekenin atap ótýdi josparlap otyr.

Baıdenniń sapary ótken túnde Gaza sektoryndaǵy aýrýhanada júzdegen adamnyń ómirin qıǵan jarylystan keıin Taıaý Shyǵysta bastalǵan narazylyq sherýlerimen tuspa-tus kelip otyr. Palestınanyń resmı ókilderi "jarylys «Islamdyq jıhad» zymyranynyń áserinen bolǵanyn" málimdegen Izraıldi aıyptady.

Sársenbide Izraıl áskerıleri nysanǵa Izraıldiń áýe shabýylyn jasaý múmkindigin joqqa shyǵaratyn aýdıo jáne vızýaldy dáleldemelerdi usyndy.

Izraıl 7 qazanda 1400 adamnyń ómirin qıǵan shabýyldarǵa jaýap retinde Gaza sektoryn baqylap otyrǵan HAMAS tobyn joıýǵa ýáde berdi. Palestınanyń densaýlyq saqtaý salasy ókilderiniń málimetinshe, Gaza sektorynda keminde 3 myń adam qaza tapty.