AQSh prezıdenti beısenbi kúni halyqqa úndeý jasaıdy
ASTANA. KAZINFORM — AQSh prezıdenti Donald Tramp beısenbi, 16 shilde kúni keshke halyqqa úndeý jasaıtynyn málimdedi, dep jazady Anadoly.
— Prezıdent Tramp beısenbi kúni Shyǵys jaǵalaýy ýaqytymen saǵat 21:00–de halyqqa úndeý jasaıdy. Nazar aýdarǵandaryńyzǵa raqmet! — dep jazdy Tramp dúısenbi kúni óziniń Truth Social áleýmettik jelisindegi paraqshasynda.
Bul málimdeme AQSh pen Iran arasyndaǵy ózara soqqylar almasýy jalǵasyp jatqan tusta jasaldy. Buǵan deıin Tramp AQSh-tyń Iranǵa qatysty «teńiz blokadasyn» qaıta engizetinin jarııalap, Ormýz buǵazy arqyly tasymaldanatyn júkterge 20 paıyzdyq baj salyǵyn engizýdi usynǵan bolatyn. Onyń aıtýynsha, mundaı alym AQSh-tyń osy strategııalyq mańyzdy sý jolynyń qaýipsizdigin qamtamasyz etýi úshin alynbaq jáne bul jospardy iske asyrý dereý bastalady.
Óz kezeginde Irannyń Syrtqy ister mınıstri Abbas Arakchı Tegeran Ormýz buǵazynyń «qorǵaýshysy» bolyp qala beretinin aıtty.
— 20 paıyz — árıne, tym kóp. Biz ádil bolamyz, — dedi ol.
Eske salsaq, sáýir aıynda AQSh pen Iran atysty toqtatý týraly kelisimge kelip, keıin aqpan aıynyń sońynda bastalǵan soǵysty toqtatýdy, Ormýz buǵazyn tolyq ashýdy jáne Iran porttaryna qoıylǵan blokadany alyp tastaýdy kózdeıtin ózara túsinistik týraly memorandýmǵa qol qoıǵan edi.
Sondaı-aq taraptar Irannyń ıadrolyq baǵdarlamasyn qosa alǵanda, sheshilmegen máseleler boıynsha kelissózder júrgizý úshin 60 kúndik merzimge kelisken bolatyn. Bul másele AQSh pen Izraıldiń Iranǵa jasaǵan soqqylarynyń negizgi sebepteriniń biri retinde atalyp keledi.
Búǵan deıin Tramp ózine Iran qastandyq jasasa, tutas eldi joıyp jiberetinin málimdedi.
