AQSh prezıdenti Alıaskada munaı men gaz óndirýge ruqsat berdi

ASTANA.KAZINFORM — Tramp ákimshiligi Alıaskanyń Arktıkalyq ulttyq jabaıy tabıǵat qoryǵynda munaı men gaz burǵylaýǵa ruqsat berý josparyn jarııalady, dep habarlaıdy New York Times.

Seısmıkalyq derekterge súıene otyryp, AQSh Geologııalyq qyzmeti jaǵalaýdaǵy jazyqta 4,3-ten 11,8 mıllıard barrelge deıin munaı bar ekenin málimdedi.

AQSh Іshki ister mınıstrligi munaı men gaz óndirý quqyǵyna aýktsıon jarııalaıtynyn jáne Alıaskanyń ońtústik-batysyndaǵy ulttyq jabaıy tabıǵat qoryǵy arqyly jol salýǵa ruqsat beretinin málimdedi.

Jol qurylysyna qarsylar bul jabaıy tabıǵatqa, sondaı-aq ań aýlaý men balyq aýlaýǵa táýeldi Alıaskanyń baıyrǵy taıpalaryna orny tolmas zııan keltiredi dep málimdeıdi.

Bul aımaq — AQSh-tyń taza ári jabaıy tabıǵat ýchaskeleriniń biri. Ol 1,56 mıllıon akr (6300 sharshy shaqyrym) aýmaqty alyp jatyr. Onda aq aıý, soltústik buǵylary,  qustar jáne basqa da jabaıy ańdar mekendeıdi.

Donald Tramp prezıdenttik qyzmetindegi alǵashqy merziminde eki munaı men gaz lızıngin satýdy qamtıtyn 2017 jylǵy salyq zań jobasyna qol qoıdy. Biraq keıinirek Baıden ákimshiligi bul kelisimderdi joıdy.

Tramp AQSh-tyń munaı men gaz óndirisin keńeıtý jáne «amerıkalyq energetıkalyq ústemdikke» qol jetkizý josparynyń bóligi retinde Arktıkadaǵy burǵylaýdy arttyrýǵa birneshe ret ýáde berdi. Bul «shalǵaı aımaqty burǵylaý kerek pe» degen másele jarty ǵasyrǵa jýyq ýaqyt boıy qyzý saıası jáne quqyqtyq pikirtalas týdyrdy.

Buǵan deıin Tramp Alıaskada mys pen myrysh óndirisin arttyrýdy maquldaǵany habarlanǵan bolatyn.