AQSh pen Ulybrıtanııa Parıj sammıtinde JI deklaratsııasyna qol qoıýdan bas tartty

ASTANA. KAZINFORM – Eýropadaǵy eń iri jasandy ıntellekt máseleleri jónindegi sammıtte memleketter II-di retteý úshin qabyldaýy tıis sharalar talqylandy, bul múmkin bolatyn qaýipterdiń aldyn alýǵa baǵyttalǵan, dep habarlaıdy  VVS.

JI retteý týraly deklaratsııany Frantsııa, Qytaı, Aýstralııa, Japonııa jáne Úndistandy qosa alǵanda, 60 el qoldady. Qujatta jasandy ıntellekt tehnologııasyn damytýǵa kózqaras «ashyq», «ınklıýzıvti» jáne «etıkalyq» bolýy kerek delingen. Sondaı-aq, sammıtte JI energııasyn tutyný máselesi alǵash ret talqylanǵany atap ótildi, sarapshylardyń eskertýinshe, ol aldaǵy jyldary shaǵyn elderdiń deńgeıine kóterilýi múmkin.

Kelisimge qol qoımaǵan elderdiń qatarynda AQSh pen Ulybrıtanııa bar. 

Politico málimetinshe, AQSh-tyń «turaqty jáne ınklıýzıvti JI» degen tujyrymǵa kóńili tolmaǵan. Sammıt barysynda AQSh vıtse-prezıdenti Djeı Dı Vens Parıjdegi delegattarǵa jasandy ıntellektti shamadan tys qatań retteý «jańa damyp kele jatqan transformatıvti salany joıyp jiberýi múmkin» ekenin aıtty.

Parıjdegi sammıtke qatysý – AQSh-tyń jańa vıtse-prezıdenti Djeı Dı Venstyń alǵashqy sheteldik sapary. Onyń aıtýynsha, jasandy ıntellekt – bul «Tramp ákimshiligi jiberip almaıtyn múmkindik». Vens sondaı-aq «II-diń ósýine yqpal etetin saıasat» qaýipsizdikten basym bolýy kerek dep málimdedi. Onyń pikirinshe, bul úshin jasandy ıntellekttiń damýyna jol ashatyn, «ony tunshyqtyrmaıtyn» retteý qajet.

Vıtse-prezıdent sonymen qatar eýropalyq kóshbasshylar «bul jańa shekaraǵa úreımen emes, optımızmmen qaraýy kerek» dep qosty. 

Djeı Dı Venstiń sózderi Frantsııa prezıdenti Emmanıýel Makronnyń ustanymyna qaıshy keledi. Ol Úndistan premer-mınıstri Narendra Modımen birge sammıttiń teń tóraǵalarynyń biri jáne salany kóbirek retteýdi jaqtaıdy. 

- Bizge JI-ny damytý erejeleri qajet, - dep málimdedi Makron sammıtte. 

Ulybrıtanııanyń ustanymy 

Ulybrıtanııa buryn JI qaýipsizdigine qatysty máselelerdi kóterdi: el premer-mınıstri Rıshı Sýnak 2023 jyly osy taqyryp boıynsha álemdegi birinshi sammıtti ótkizgen bolatyn. 

Endi el basshylyǵy kelisimge qol qoıýdan nelikten bas tartyp otyrǵanyna naqty jaýap bermeı otyr. 

Guardian aqparat kózi Ulybrıtanııa bul qadamǵa AQSh-qa jaǵý úshin bardy degen usynysty joqqa shyǵardy.

Full Fact faktchekıng uıymyndaǵy JI bóliminiń jetekshisi Endrıý Dadfıld úkimettiń Parıj kommıýnıkesine qol qoımaý týraly sheshimi Ulybrıtanııanyń ımıdjine qaýip tóndiretinin málimdedi. 

Buǵan deıin Frantsııa jasandy ıntellekt sektoryna 109 mlrd eýro jeke ınvestıtsııa tartýdy kózdep otyrǵanyn jazǵan bolatynbyz.