AQSh pen Ýkraına soǵysty toqtatý týraly kezekti kelissóz ótkizdi

ASTANA. KAZINFORM — AQSh prezıdentiniń beıbitshilik máseleleri jónindegi arnaıy elshisi Stıv Ýıtkoff pen prezıdenttiń keńesshisi Djared Kýshner Ýkraına Ulttyq qaýipsizdik jáne qorǵanys keńesiniń hatshysy Rýstem Ýmerovpen jáne Ýkraına Qarýly kúshteri Bas shtabynyń bastyǵy, general Andreı Gnatovpen eki kúndik kelissózder ótkizdi. bul týraly AQSh Memlekettik departamenti málimdedi.

Armenpress habarlaǵandaı, Sońǵy eki aptadaǵy altynshy kezdesýde taraptar Ýkraınada turaqty beıbitshilikti ornatý múmkindikterin talqylady. Rýstem Ýmerov Ýkraına úshin basymdyq — eldiń táýelsizdigi men egemendigin qorǵaýǵa, ýkraınalyqtardyń qaýipsizdigin qamtamasyz etýge jáne elde demokratııanyń órkendeýine berik negiz qurýǵa múmkindik beretin qaqtyǵysty retteý ekenin rastady.

Taraptar AQSh pen Reseı arasyndaǵy osyǵan uqsas kezdesýlerdiń nátıjelerin jáne soǵysty toqtatýǵa ákelýi múmkin qadamdardy talqylady. Kezdesý barysynda AQSh pen Ýkraına resmı ókilderi naqty progress Reseı turaqty ári myzǵymas beıbitshilikti ornatýǵa baǵyttalǵan qadamdar jasaýǵa daıyn bolǵan jaǵdaıda ǵana múmkin ekenin atap ótti.

AQSh prezıdentiniń beıbitshilik máseleleri jónindegi arnaıy elshisi Stıv Ýıtkoff pen prezıdent keńesshisi Djared Kýshner buǵan deıin Máskeýde joǵary laýazymdy reseılik sheneýniktermen de kezdesken-di.

Eske sala ketsek, Aq úı Ýkraına boıynsha beıbitshilik josparyna eleýli ózgerister engizgenin málimdegen edi. 

Al odan bir kún buryn Marko Rýbıo AQSh pen Ýkraına delegatsııalarynyń kelissózi nátıjeli ótkenin aıtty.