AQSh pen Ýkraına delegatsııasy Saýd Arabııasynda kelissóz júrgizedi
ASTANA.KAZINFORM — Saýd Arabııasynda ótetin kezdesý týraly Ýkraına prezıdenti Vladımır Zelenskıı men AQSh prezıdentiniń arnaıy ókili Stıv Ýıtkoff habarlady, dep jazady Euronews.
Brıýsseldegi sammıtke qatysqan Ýkraına prezıdenti Vladımır Zelenskıı H áleýmettik jelisinde kelesi dúısenbi kúni Saýd Arabııasyna «taq murageri hanzadasymen kezdesý úshin» baratynyn jazdy.
Osydan keıin onyń komandasy amerıkalyqtarmen kelissóz júrgizý úshin Saýd Arabııasynda qalatynyn da aıtty.
— Ýkraına álemge kóbirek úmit artady. Buǵan deıin AQSh prezıdentine aıtqanymyzdaı, Ýkraına tez ári senimdi beıbitshilikke jetý úshin syndarly jumysyn jalǵastyrady, — dep jazdy Zelenskıı.
DW habarlaýynsha, AQSh prezıdentiniń arnaıy ókili Stıv Ýıtkoff Vashıngtonda ótken baspasóz máslıhatynda Ýkraına delegatsııasymen kelissózder Saýd Arabııasynda 11 naýryzda ótýi kerek ekenin aıtty. Ol kezdesýde «beıbit kelisim» sharttaryn jáne atysty toqtatý múmkindigin talqylaý josparlanǵanyn aıtty.
Fox News jýrnalısi Djekı Haınrıh buǵan deıin AQSh-tan kelissózderge Memlekettik hatshy Marko Rýbıo, AQSh prezıdentiniń ulttyq qaýipsizdik jónindegi keńesshisi Maık Ýoltts jáne Donald Tramptyń Taıaý Shyǵystaǵy Arnaıy ókili Stıv Ýıtkoff qatysatynyn aıtqan bolatyn. Ýkraınanyń atynan Prezıdent Keńsesiniń basshysy Andreı Ermak qatysady.
Esterińizge sala keteıik, Reseı men Ýkraına arasyndaǵy qaqtyǵysty tez arada aıaqtaý AQSh prezıdenti Donald Tramptyń saılaýaldy ýádeleriniń biri bolǵan. Ótken aptada ol Vashıngtonǵa kelgen Vladımır Zelenskııdi beıbitshilikke daıyn emes dep aıyptady.
Al 5 naýryzda Tramp Ýkraına prezıdentinen Vladımır Zelenskıı «turaqty beıbitshilikke jetý úshin» jumys isteýge daıyn ekenin málimdegen hat alǵanyn habarlady.